Olmis di Diu - A. Beline

Ancjemò une volte e je comparide la bontât di Diu nestri salvadôr e il so amôr pai oms (Tt 3, 4) e nô si preparìn a vivi, tal misteri e sot i vêi sacramentâi, chest event unic. Un event che al à rivoluzionade la storie, riconsacrade la tiere, ricreade la gjernazie umane. Di fat la storie no je plui, o no varès di jessi, la civiltât o inciviltât dai oms cence o cuintri Diu, ma il lôr percors cun lui, deventât Emanuel, Diu cun nô, Diu come nô, Diu par nô. No plui une storie maladete, ma une storie sacre, un troi di santitât. La tiere, deventade ostîl a Diu e inospitâl al om, e torne a jessi il lûc de sô presince e duncje e je tiere sante, riscatade, purificade dal so sanc e fecondade de sô gracie.

Ancjemò une volte o celebrìn il misteri di chel Diu che no dome al fâs il mont, no si contente di contemplâlu te sô bielece, ma al plante la tende tal nestri desert, al ven in cjase sô. Ma, al zonte Zuan, i siei no lu àn acetât ( Zn 1, 11). Al è chest incuintri simpri bramât e mai concludût, chest corisi daûr come inemorâts che no rivin a cjolisi e no rivin a stâ cence, chest arc scomençât e mai sierât il misteri dal Nadâl. Un misteri di lûs ma ancje di scûr, di brame ma ancje di ripulse. E la liturgie, te sô fuarce sacramentâl, nus da ancjemò une volte la pussibilitât di incuintrâlu, di contemplâlu, di invidâlu a cjase nestre, te scune dal nestri cûr.

Pecjât che une ocasion cussì splendide e forsit inripetibil, cun tantis che in’ vin aromai strassadis, e riscji di deventâ l’enesime comedie, là che dut si distrighe in lampadinis coloradis, côi di panetons, regâi stupits, cjançons dissacradis e banâls. Nadâl fieste de esclusion, impen di fieste dal incuintri. Nadâl fieste de evasion, impen di fieste di une autentiche incjarnazion tal nestri cûr e tal mont.

Bisugne tornâ a l’essenzialitât, a la sacralitât, a la serietât dal Nadâl, se no al è miei abolîlu come ch’al à fat Fidel Castro e i siei compagns ditatôrs. Almancul in chei paîs si veve la brame de fieste, impen di assuefazion e de sglonfe. Di fat i grancj conseis che a vegnin dâts in chescj dîs sun ogni pulpit mediatic, no son di fermâsi tal cidin de propie cussience a fâi larc tun cûr cjamât e disordinât, ma cemût dâ dongje il cenon de vee e il gustâ dal dì. La grande cuistion no je di jemplâsi di lûs e di vê l’anime lisere e contente, ma di meti sù cualchi chilo e rivâ a parâlu jù a celebrazion finide. Une cuistion di diete, di caloriis, di linie, plui che di fede, di religjon, di conversion.

Dut chest clime di lûs artificiâl, di furniment esteriôr, di consumisim slavrât, di false ligrie, al riscje di umiliâ, emargjinâ, fâ patî ancjemò di plui chei che a son i prins, e i unics, distinataris de buine gnove dal agnul: i puars, i piçui, chei cence non, cence storie, cence dignitât, cence avignî, condanâts a une eterne insignificance.

Epûr il Nadâl al è e al reste la lôr grande ocasion di jessi consolâts e gratificâts. Nadâl nol è il Nadâl dal paneton, ma di chei che a son cence pan. Nol è il Nadâl des pelicis, ma di chei che a sbalsin di frêt. Nol è il Nadâl des stradis inondadis di lûs mate, ma di chei che si tirin dongje un cul altri, tun canìs, fasintsi lûs e sclipintsi cuntune cjandele. Nol è il Nadâl dai furtunâts, ma dai falîts. E Diu al cjalarà lis lôr lagrimis, plui che lis nestris musis passudis. Intant che nô si jemplìn di presepis e di bambinuts, il Fî di Diu al va a cirî l’ultim cjanton sociâl e uman e li, dome li, al ripet il grant meracul. Al è te miserie di ogni om che il Fî dal om al cîr e al fâs la sô cjase benedete.