Olmis di Diu - A. Beline

A son passe vincj agns che o ai tacât a scrivi ancje par chei altris. Une sielte no facile pal fat che ogni publicazion e je une sorte di confession, là che si riscje o di no spiegâsi ben o di no jessi capîts. Ma aromai e je fate.
Il prin part al è stât chel des flabis di Fedro e al tacave cu la vision poetiche di un agnelut ad ôr di un riu. Ma dongje di ogni riu e di ogni agnel al è simpri pront un lôf cu la fan trascurade. Di li o ai capît che la clâf de storie e je la prepotence, il pes grant che al mangje il pes piçul. “E al è just che al sedi cussì – mi à spiegât un om di Val – parcè che s’al ves di sucedi il contrari, il pessut nol rivarès a digjerî il pes grant e al murarès instes”.
O ài volût lâ plui a font, cirint cun fadie e dolôr intai fats de storie grande e piçule dal om, par viodi se chest al jere propit il so distin. E o ai cjatât che a gambiin i sistemis de violence, la tecniche, ma la musiche e je simpri chê: che il grant al mangje il piçul e il trist al cope il bon. In ogni timp, in ogni clime, in ogni ideologjie, sot di ogni cîl.
Ma si puedial rassegnâsi a une vision cussì tragjiche de vite, confermade par altri dai fats de storie?
O ai viert il libri dai libris, chel che al conte i fats ma al va ancje a cirî un significât profont, teologjic, providenziâl. Ancje la Bibie e cognòs il mâl. Dibant no ripuarte intes primis pagjinis la tragjedie di Abêl e plui in là il lament corâl dal popul ebraic in Egjit. Dome che no si rassegne, parcè che al sarès come dî che Diu al à pierdût sun dut il front.
Un dai libris plui inluminants in merit al è chel de Sapience, ultin dal Vieri Testament come timp ma no come impuartance. In chest libri si fevele de sfide eterne, sistematiche, inesorabil dai triscj che a tindin palissis ai bogns par fâ sparî ancje la lôr semence, par no vê denant dai vôi il spieli de lôr carognetât. Une sfide sacrileghe, parcè che a disin: “Se il just al è propit fî di Diu, lui i darà une man” (Sap 2,18).
Se Diu al esist, nol pò tasê denant dai olocauscj vieris e resints, dal berli grant come la tiere che al salte fûr di chês bocjis sanganadis e cence vôs, il berli dal silenzi. Se nol interven, o che no i interesse o che nol esist.
Resonament ingjenuo, scandalôs e patetic. Se Diu al esist, al rispuindarà a mût so. E se lui al è il Diu de vite, nol varà nissun fastidi a spalancâ lis busis là che i carnefiçs a an butadis lis lôr vitimis. Parcè che al è un Diu di resurezion. Ma resurezion ancje in chest mont. Difat, cuintri ogni logjiche, tal moment de lôr plui grande rogance, i triscj, personis o sistemis, a pierdin vincint e i puars e i biâts, tal moment de lôr plui grande umiliazion, a vincin pierdint. Come Crist, che tal moment disperât de muart al jere plui dongje de resurezion.
Ma i bogns a scuegnin paiâ salade la lôr vitorie, cun dolôrs inenarabii e cun muarts orendis. La vitorie e je un at di fede, cu la cuâl che la sconfite e je sot i vôi di ducj. Epûr la storie e je la plui grande sorprese. Il mâr di sanc e di violence nol à rivât a sumierzile e la semence dai bogns no je mai lade pierdude. Il Friûl, e ancje la glesie, al à une sole briscule: cjaminâ pe strade de justizie e Diu lu salvarà. Magari lant a tirâlu fûr di sot tiere.