Notiziis e avîs

Al è stât publicât “Cjantis di glesie dal Popul Furlan” un dopli CD cun valôr didatic. Un supuart par ogni comunitât, parochie, plevan o laic adet a sostignî il cjant liturgjic. Une vuide e esempli par imparâ e insegnâ il patrimoni musicâl corâl dal cjant liturgjic di ande furlane e no dome.

La racuelte e cjape dentri i cjants, a struture semplice e corâl, par ducj i timps liturgjics e par ogni celebrazion.

Al è l'esit finâl di une lungje ricercje dai cjants de tradizion patriarcjine di Aquilee che pre ‘Sef Cargnello al à fat, ancjemô tai agns 60 dal secul passât.

Une ricercje minuziose e la regjistrazion, vocâl, ator pai paîs dal Friûl di ducj chei cjants che i vecjos cantôrs di glesie a conservavin ancjemò te lôr memorie. Un patrimoni orâl, duncje no scrit, che al riscjave di murî insieme cantôrs, e che Iis riformis liturgjichis a vevin butât vie di corse, cun masse premure. Pre ‘Sef al à salvât in timp tesaurs e perlis che se no a saressin pierdudis par simpri.

Di chescj cjants antîcs e je stade fate la trasliterazion: la traduzion par furlan, cu la stesse metriche dai tescj liturgjics latins, e permet di cjantâ ancjemò chestis melodiis al dì di vuê che il latin nissun no tu mastie plui.

In cheste maniere, recuperant la melodie e ancje il test liturgjic te lenghe vive dal popul, si rive a dâ ancjemò dignitât e misticitât a lis nestris liturgjiis masse spes massacradis di conzonetis e di banalitâts.

DOMENIE 1 DI DICEMBAR DAL 2013 
te sale Patriarcje Bertrant in canoniche a Vençon dopo dal cjant dai Gjespui fat in Domo a 3 dopo di misdì il prof. Agnul Vianello proretôr de Universitât dal Friûl al presentarà:
RENATO JACUMIN: UN STUDIÔS E UN AMÌ

DOMENIE 15 DI DICEMBAR DAL 2013
tal Domo di Vençon a 3 dopo di misdì 
TE TRADIZION PATRIARCJINE UNE PROPUESTE PAL GNÛF CJANT LITUGJIC FURLAN
presentazion dal CD “Cjantis di Glesie dal popul furlan” cun esemplificazions dal coro “Rosas di Mont” di Guart e celebrazion dal Missus.

Glesie Furlane e je un Associazion che e opere di passe 40 agns sul plan culturâl. I prins agns si lavorave cun tante passion, cun impegn seguitîf, cun profonts ideâi, ma cun risorsis economichis pluitost scjarsis, fasint par altri sintî simpri la nestre vôs e la nestre presince.

Plui in ca, grazie a la sensibilitât de Regjon, de Provincie di Udin, e de Fondazion CRUP, che tal fratimp a vevin ancje capît il valôr di une culture e di une lenghe milenarie di difindi midiant di leçs apropriadis e finanziaments, cu la stesse passion, impegn e ideâi o vin podût produsi studis, analisis, ricercjis, riflessions… publicant cun plui costance e cure libris e un sît internet www.glesiefurlane.org par difondi e svilupâ une cussience e une cognossince simpri plui profonde de nestre identitât e de nestre storie.

Di chest o vin agrât ancje ai Ents publics nomenâts parsore e ae Fondazion CRUP che nus àn permetût di lavorâ in maniere plui professionâl.

Grazie a la colaborazion de Provincie di Udin, cumò o vin il plasê di furnî lis Bibliotechis dai Comuns dal Friûl di une part de nestre produzion leterarie par che tante int dai nestris paîs e puedi vê plui struments di cognossince de nestre storie e dal patrimoni di culture, vite e pinsîr dal nestri popul.

Sigûrs che cheste nestre iniziative e cjati bon acet, o saludìn cuntun biel mandi.

Patrie dal Friûl – Vilegnove di S. Denêl, ai 30 di otubar dal 2013