L’impegn di Fontanini par pre Antoni
24 di Setembar 2008
Plui il timp al passe e plui la vôs di pre Antoni e cjape fuarce. La ultime biele gnove e ven di Palaç Belgrât, sede de Provincie di Udin, li che ai 24 di Setembar il president on. Pieri Fontanini al à ricevût une delegazion di Glesie Furlane, vuidade di Zuan Pieri Biasat, dean de associazion. Cun lui a jerin ancje il vicepresident bons. Roberto Bertossi, pre Roman Michelot, president de clape di culture “La Patrie dal Friûl”, Christian Romanini, in rapresentance de redazion de riviste e pre Tonin Cjapielâr, segretari di Glesie Furlane.
Dopo une prime presentazion gjenerâl su la ativitât resinte dai doi sodalizis che pre Antoni Beline al è stât la vuide carismatiche, il dean di Glesie furlane al è jentrât tal detai dal progjet di realizazion de Opera Omnia dal predi e inteletuâl furlanist, specificant che il progjet al viodarâ une racuelte sistematiche e complete di siei scrits, intervents, riflessions, omeliis, intervistis. “No je une iniziative che e ponte a une museificazion de memorie di pre Antoni” al è stât specificât “ma la intenzion di proponi il pinsîr di un om che al à simpri cirût di atualizâ il so messaç, rivant adore simpri a fevelâ al om di vuê”. E je stade ancje riclamade cun fuarce ancje la sielte di continuâ, pal moment, a publicâ i scrits di pre Antoni dome par furlan, par onorâlu e continuâ la sô vore tal so spirt, come che al jere stât za declarât tal comunicât di Glesie furlane, jessût ai 14 di Lui dal 2008 (viôt il comunicât intîr su La Patrie dal Friûl – n. 7 Lui 2008, n.d.r.).
“Al è un dovê pe Provincie di Udin” al à confermât il President Fontanini “La opare di pre Antoni e merte atenzion e cheste iniziative e varà la poie di cheste aministrazion”.
Cumò Glesie furlane e reste in spiete di jessi tornade a contatâ di bande dai Uficis provinciâi par formalizâ l’acuardi plurienâl che al sarà a la fonde di chest progjet di racuelte di dute la produzion di pre Antoni Beline.