La prime letare a Timoteu
Cheste e je la prime di chês trê letaris che, tal “corpus” paulin, la tradizion cristiane lis à simpri clamadis “pastorâls”, par vie che lis mande ai responsabii, “pastôrs”, de comunitât tal regi e tal inmaneâ la glesie. Il vocabolari, il stîl e soredut l’implant teologjic di chestis voris a son diferents di chei des letaris autentichis di Pauli. Par altri si sa benon cemût ch’a fasevin tant te tradizion bibliche come ancje in chê cristiane dal prin secul: par dâ fuarce a di un scrit, si fasilu passâ cul non di un ch’al è za cognossût e preseât. Tal câs nestri, tes trê letaris si sint l’influence di Pauli e si partìs di lui par esibî un stamp di glesie e une vite cristiane in linie cu la tradizion. Pa la cuâl chescj trê scrits, ju varès mandâts – tor dai agns otante – un dissepul di Pauli, ch’al vîf te glesie di Efeso, ai doi colaboradôrs plui cognossûts e plui fedêi, Timoteu e Tito.
Lis trê letaris a àn colegance fra di lôr no dome pal stîl e pal telâr teologjic e spirtuâl, ma ancje pe situazion storiche e pal contest culturâl. Di fat la glesie e tache za a criçâ par cont di dutrine o di dissipline.
Un trop di cristians, di ambient gjudaic, a scomencin a svariâ cul rimpin di une religjon plui severe e a condanin tant il matrimoni come ancje il mangjâ cjar. L’organizazion si va slargjant par intaiade, diferenzeant funzions e servizis. Nol mancje il cantin di cemût frontâ l’ambient paian dulintor.
La prime letare mandade a Timoteu e fronte un mac di cuistions de vite de comunitât cristiane cul solit telâr di simpri: direzion, salût di jentrade e prin di lassâsi (1,1-2; 6,20-21).
L’autôr al tocje trê grandis cuistions. La prime e je il cavîl cuintri dai dissidents, che lui ur presente invezit un progjet di vite cristiane e comunitarie positive (1,3-11; 4,1-5; 6,3-10.17-19). La seconde, ch’e ingrume istruzions e regulis, e je chê dal pastôr, sul stamp di Pauli. La tierce, che le disvuluce di plui, e rivuarde cemût sielgi chei ch’a varan di fâ di pastôrs, vadì predis e diacuns; regulis pes svareadis categoriis di personis, pes veduis e pai sotans. In jenfri l’autôr al met tocs di dutrine, formulis di fede, sflics di cjantis e di preieris par sclarî simpri plui miôr la fonde tradizionâl de esortazion (1,12-17; 3,14-16).
In struc, la prime letare pastorâl e je un document une vore impuartant par cognossi cemût ch’e jere inmaneade la prime glesie. Denant de crise par colpe des barufis tra cristians, e dai suspiets di chei di fûr, la comunitât cristiane e reste fedêl a la tradizion e tal stes timp s’insede tal mont cjapantlu par chel ch’al è concretamentri.