Il libri di Qoelet
Al non ebraic Qoelet, un non no di persone ma di funzion (= “chel ch’al fevele te semblee”, tant a dî une sorte di mestri o di diretôr di discussion intune cercle di sapients) al corispuint il non grêc di Eclesiast. Il titul precîs al è “Peraulis di Qoelet, fi di David, re di Gjerusalem”. Il solit artifici leterari par dâi a Salomon la paternitât di un libri scrit cun dute probabilitât tor la seconde metât dal III sec. p.d.C. e duncje sietcent agns dopo dal re plui sapient de tiere.
Il Qoelet al smicje a dâi une rispueste a un probleme pratic e universâl: ce vuadagnial l’om cun dut il so strussiâsi e se in chest mont si pò rivâ a la felicitât. O sin su la tematiche di Jop, che si tormentave par savê se il ben e il mâl a vevin o no un premi e un cjastic in cheste vite.
Lant indenant par grâts, al mostre come in chest mont no si podarà par mai rivâ a une felicitât plene e perfete, parcè che si scuen scombati masse par vê pôcs bens e malsigûrs, miscliçâts a un stragjo di mâi e sigûrs.
Une vision duncje pessimistiche dal mont che, a distance di miârs di agns, e cjate un revoc tes filosofiis esistenzialistichis modernis e tai autôrs plui disperâts de leteradure di ogni timp. Une diference però si le cjate in chest libri cussì crût e dibot cinic: Qoelet al è un om religjôs e al invide a cjapâ des mans di Diu tant il ben che il mâl, savint che dut al à un sens plui profont, ancje se pal om al semee che dut al sedi nuie. Il misteri di une vite eterne lu tormente ma nol rive a cjatâ une soluzion. Tant val duncje cirî di gjoldi fint in font chei pôcs moments di ligrie che la vite nus dà, rispietant la leç di Diu e vivint tal so sant timôr.
Une peraule-clâf di chest libri e je la “vanitât”o il “nuie” di dutis lis robis creadis. Cun cheste definizion, il Qoelet nol vûl dî che lis robis a son stupidis o negativis, anzit. Al vûl dî invezit che no àn durade ni tignince e a son malsiguris, come la fumate che si sfante, come il flât ch’al salte fûr de bocje cuant che si respire, come la rosade ch’e sparìs a pene che tu le âs contemplade. Soredut no son in grât di palesânus il segret de vite e dal mont. Di chi un sens di frustrazion e di amarece, ancje se rassegnade.
Sierant chest libri si pò fâ dôs robis: butâsi te disperazion plui nere o cirî un parcè plui indenant e plui in alt. Se chi o sin tal nuie, riscjâ il dut tal Dut. Crist al confermarà in cualchi maniere la dutrine dal Qoelet su la infelicitât dai siôrs e di chei ch’a àn dut inte vite e al vierzarà un’altre strade pe felicitât cuant che al proclamarà: “Furtunâts vualtris puars” (Lc 6,20)