Il libri di Osee
Cun Osee (l’ordin cronologjic plui sigûr al met par prin Amos), si vierç l’ultin libri dal cjanul ebraic, chel dai “Dodis”, cognossûts ancje come “profetis minôrs” no pal fat che lis lôr voris a son mancul impuartantis ma dome parcè che a son plui curtis.
Nassût tal Ream dal nord, Osee al à operât te stesse ete di Amos, vadì te seconde metât dal sec. VIII p.d.C. (1,1), biel che si stave prontant la ruvine pal ream schismatic di Gjeroboam distacât di Gjude a pene muart Salomon (931p.d.C.).
Colegade cu la sô mission profetiche, e je la sô sielte di cjoli une femine pôc di sest, come che al conte intal so libri. Si sa che il so matrimoni al veve un caratar simbolic, però chest nol gjave la dificoltât de situazion.
Il libri si presente come une sorte di antologjie cence un ordin ben precîs. Dopo di vê fevelât dal so matrimoni e dal so simbolisim (cc. 1-3), il profete al passe a imputâi a Israel ducj i siei delits di idolatrie e a minaçâi un cjastic esemplâr (cc. 4-13), par sierâ cuntun invît a la conversion (c. 14).
Il teme di fonde di Osee al è chel de infedeltât di Israel tai confronts dal so Diu che, pe prime volte inte Bibie, al ven cjantât tant che il nuviç dal so popul: l’aleance ch’e peave un cun chel altri e jere un pat di amôr. Fra une menace e une condane, Osee al cjate il moment par celebrâ l’amôr di Diu cuntune intimitât e une tenerece unichis.
Cjalant indaûr a dute la storie de salvece, il profete al cjate un moment particolâr di gracie: il timp dal desert, là che il popul al jere sigurât cuintri di ogni tentazion idolatriche e di brame di bens matereâi. Il desert al è il timp e il lûc ideâl ancje par un altri aspiet: inte solitudin al è plui facil sintî la vôs di Diu e rispuindi cuntun afiet fedêl a lis atenzions di chest amant potent e trement.
Cjalant la situazion che o stin vivint cumò, ancje in Friûl, cemût si puedial dî che il mes di cheste vôs lontane tal timp al vedi pierdût di valôr e di atualitât? Cence bramâ par fuarce la miserie, al reste vêr che il moment de bondance matereâl nol è il plui induvinât pe bondance spirtuâl.