Il libri di Malachie
Al è l’ultin scrit dai profetis e dal VT par cont di sistemazion ma no di timp. Il libri al è clamât “di Malachie” ma cun dute probabilitât al è anonim, stant che il non, che par ebraic al vûl dî “mes dal Signôr”, al è gjavât di une profezie (3,1).
L’autôr al à scrit te seconde metât dal sec. V, te ete di Esdre e Neemie, cuant che i matrimonis miscliçâts fra chei ch’a jerin tornâts dongje di Babilonie e feminis forestis a jerin un probleme grivi pe puritât religjose dal popul di Diu.
Tal contest de ricostruzion dal templi, il libri, che si ispire une vore al Deuteronomi, al è preocupât dai pecjâts dai predis e de violazion de leç cultuâl de bande dal popul.
Il cult, esercitât cun fede sclete e profonde, al è il pont plui alt de religjon e la gnove ete, chê messianiche e definitive, e sarà caraterizade de ufierte di un sacrifici unic e perfet (1,11).
Cheste profezie di un gnûf sacrifici impen dai sacrificis levitics discjadûts, insieme cun chê dal precursôr dal Messie (3,1.23-24), e je il contribût veramentri origjinâl di chest libri a la rivelazion dal Vieri Testament.
No covente trope fantasie par viodi te prime profezie il sacrifici unic e universâl di Crist e te seconde la figure di Zuan il Batiste. Di fat Mt 11,10, presentant il Batiste, si riclame propit al test di Malachie.
Altre carateristiche di chest libri il sens profont de justizie di Diu che no gambie cul passâ des etis e des personis e l’universalisim de vere religjon. Cuistions, come che ognidun al pò viodi, no di pôc cont.