I libris dai Macabeus
I libris dai Macabeus a contin la storie de resistence dal popul ebraic cuintri de opression dai forescj. Un fat vonde usuâl une volte, dome che chi l’intent de lote nol è tant politic ma religjôs. I protagoniscj a sintin di jessi a part di un disen ch’al partìs di Diu. Di chi la lôr fuarce.
Il titul di “Macabeus”, ch’al à dât il non ai libris e ai sorestants e martars di chê ete epiche, al sarès dome il sorenon di Gjude, il prin campion de rivolte (1 Mac 2,4). La tradizion ebraiche e clame dute la famee cul sorenon di Asmoneus, dal non di un lôr von.
La ete dai Macabeus e à come sfont storic lis monarchiis elenistichis nassudis dopo di Alessandri il Grant (+ 323 p.d.C.). Lât in sfas il so imperi, i gjudeus si son cjatâts mo cui Tolomeus, cuant che a gjolderin di un fregul di pâs (libri dal Fi di Sirac), mo cui Seleucidis de Sirie. E chi, sot di une calme di façade, e scomence la grande prove dal popul ebraic: l’elenisim. Che nol è dome cjapâ sù la mode greche, ma pierdi in cualchi maniere, cu la culture, ancje la religjon, ricjece e peculiaritât dal popul ebraic. Un di chei moments là che si riscje di sparî parcè che ti copin l’anime (Mt 10,28) e dopo ancje il cuarp.
In cheste lote o vin, di une bande, la prepotence dal elenisim ch’al cjate cualchi sustignidôr ancje tal ambient gjudaic e, di chê altre, la cussience nazionâl peade a la leç e al templi.
I doi libris a son stâts acetâts tal cjanul dai libris sants dai gjudeus di Alessandrie, ch’a leievin la Bibie in grêc. No ju àn ricognossûts invezit i ebreus de tiere di Canaan, ch’a jerin de idee che il cjanul al fos sierât cun Denêl.
La glesie, sul esempli dai apuestui, e à acetât il cjanul alessandrin e cussì i doi libris dai Macabeus a son jentrâts te Bibie cristiane.
Sul scomençâ de ete cristiane, a son stâts scrits ancje il III e il IV libri dai Macabeus. La lôr impuartance storiche e religjose e je plui limitade; di fat a son metûts fra i apocrifs dal VT.
Il prin libri dai Macabeus
Il cuarp dal libri al pò jessi dividût in trê parts, ognidune par un dai fîs di Matatie:
I) Gjude Macabeu (166-160 p.d.C.) (3,1-9,22);
II) Gjonate (160-142) (9,23-12,53);
III) Simon (142-134) (13,1-16,24).
Il libri al è stât scrit par ebraic, ma lu vin dome midiant di une version greche.
L’autôr al è un gjudeu palestinês, ch’al à scrit dopo de muart dal tierç Macabeu ma prime che Pompeu al cjapàs Gjerusalem (63 p.d.C.).
Il timp tratât al va dal 175 p.d.C. (inizi dal ream di Antioc Epifane) al 135 p.d.C. (inizi dal ream di Zuan Ircan).
Si trate di un document di storie a caratar religjôs e nazionâl. No si pò dineâ la veretât dai fats contâts di un ch’al palese une cognossince profonde de gjeografie de tiere di Canaan e dai fats sucedûts, ma si à di tignî simpri presint il mût di scrivi la storie e lis intenzions dal autôr, ch’al intint fâ une storie religjose ancje cuant che al fevele di aveniments militârs e di berdeis politics.
In cheste clâf di leture, la disgracie dal popul e je viodude come une conseguence inmediade dai siei pecjâts e la vitorie di chescj valorôs e je merit esclusîf di Diu, il grant protagonist di dut il libri. E di Diu l’autôr al à un concet cussì alt che par solit nancje no lu nomene, preferint doprâ la peraule “Cîl”.
Un libri come chest, là che la politiche e semee di cjase, al è te linie de storie de salvece: salvant la libertât religjose e l’indipendence nazionâl, si salve il gjudaisim, ch’al è la strade che Diu al à sielzude par rivâ a la plenece de rivelazion.