Il libri dai Judiçs
Il titul al tradûs la peraule ebraiche tal so sens etimologjic precîs e lu ripuartin dutis lis traduzions di une volte e di cumò. Dome in chê siriache o cjatìn, dongje dal titul etimologjic, ancje chel reâl de peraule (Libri dai liberadôrs dai israelits).
Il volumut al è une racolte di fats cun protagoniscj di ecezion, che Diu ju mande par guidâ i israelits tes campagnis cuintri dai nemîs locâi (cananeus e filisteus) e stranîrs. Chescj oms a vegnin clamâts judiçs o salvadôrs, là che il secont titul al è plui just dal prin.
In Israel il judiç al jere prin di dut un om carismatic, sielzût di Diu par un compit specific, e un sorestant militâr. Puartade a bon fin la sô vore, al mantignive dute la sô autoritât morâl tal disberdeâ i cavîi che a nassevin fra lis personis o lis tribûs.
O cognossìn dodis judiçs, dividûts in grancj e piçui (o maiôrs e minôrs) cuntun criteri vonde discutibil. I prins a son chei che il libri al trate plui a lunc; i seconts a son chei che il libri al va pôc plui in là dal riferimet anagrafic. La storie dai dodis judiçs e cjape dentri pôc mancul di cutuardis cjapitui, cun dôs introduzions, une di caratar storic-gjeografic su la penetrazion ebraiche inte tiere di Canaan e chê altre di caratar teologjic-religjôs, ch’e spieghe i fats come une ripetizion fisse di cuatri timps: il popul al pecje di idolatrie, Diu lu cjastie fasintlu tibiâ dai forescj, il popul si mende e al domande jutori, Diu i mande un judiç che lu libere.
Chest scheme nus fâs pensâ a un compiladôr plui che a un autôr. La sô vore e je stade chê di meti dongje documents di etis e di ambients diferents che al è intrigôs di intivâ alc di precîs su la lôr riunde. Une ecezion e je la cjante di Debore (c. 5), che ducj a son d’acuardi tal ricognossi l’antichitât. Il test dai Judiçs come che lu vin cumò al pò jessi stât metût adun tai ultins secui dal ream di Gjude, tal timp dal esili o ancje plui in ca. Si trate di une storie a tesi, là che al è plui impuartant l’insegnament religjôs che no il fat in sè. Pa la cuâl si pò fevelâ plui di veretâts parziâls che no di falsetât storiche.
Come timp che a son sucedûts i fats ripuartâts, se o tignìn come pont fêr la elezion di David al an 1000 p.d.C., no si varès di lâ plui in là de metât dal sec. XII e plui in ca de fin dal sec. XI, stant che Eli (1Sam 1,14s), e in part forsit ancje Samuel, al jere contemporani di Sanson.
Ancje chest libri al à une sô impuartance pe profonde concezion teologjiche de storie. Se il popul al rive a tignî dûr tal moment plui grivi al è un don di Diu, che al mande i siei judiçs, e lis dificoltâts superadis a son consideradis un cjastic di Diu plui che meretori. Dal pont di viste religjôs, chi dentri o cjatìn une documentazion preziose de lente evoluzion culturâl e di altris aspiets de vite tai siei rapuarts cun Diu. Cheste testemoneance, dispès contrarie a la Leç di Mosè, e la scletece che a vegnin contâts certs fats (come l’avôt sconcertant di Jefte dal c. 11 e il delit orent di Gabae dal c. 19) a deponin pe serietât di informazion dal nestri autôr cence non e cence muse.