Il libri di Gjone
Un dai libruts plui gjoldibii e popolârs e l’unic in forme di conte o narazion storiche cence nissune sentence o vaticini. La profezie e je dade de storie personâl di Gjone, un profete vivût te seconde metât dal sec. VIII p.d.C., sot Gjeroboam II e ricuardât in 2Re 14, 25.
L’autôr, cence non e siguramentri vivût plui in ca, tal IV sec., al dopre il non dal personagjo storic par fevelâ de resistence che Israel i à fat a Diu cul no volê partecipâ i siei dons di salvece a ducj i popui. Cussì Gjone al devente un spieli di Israel e Ninive un spieli dal mont fûr di Israel. Une sorte di parabule de mission universalistiche dal popul ebraic.
Diu al mande Gjone a Ninive par invidâ dute chê gjenie di pecjadôrs a gambiâ vite. Il profete al disubidìs e al scjampe, ma Diu lu brinche instès e lu fâs butâ fûr de nâf. Glotût di une besteate di mâr, dopo trê dîs al ven butât su la rive. Al à vût dut il timp di rifleti, di domandâ perdon e di risolvisi a rivâ in puart cu la sô mission.
Il test al è une vore vîf e al rive, tune forme didatiche induvinade, a fâ capî a la comunitât post-esiliche che nol è il câs di sierâsi in privilegjos ma di cjapâ il larc e di predicjâ la salvece a dut il mont. O vin duncje, come dutrine, un dai ponts plui alts di dut il VT. Diu nol è dome il Diu dai gjudeus ma ancje il Diu dai popui e paians, parcè che Diu al è un sôl (Rm 3,29).
Gjesù al à volût onorâ chest libri e chest autôr cjapant Gjone come spieli e figure de sô vitorie su la muart midiant de resurezion e clamant la int di Ninive a testemoni de durece dal cûr dai siei contemporanis, che no volevin viergisi a la salvece.
L’argomentazion di Crist e acete il libri come ch’al è scrit, cence jentrâ in merit de sô storicitât, come che l’autôr de letare ai Ebreus al doprarà la figure di Melchisedec re e predi a proposit dal sacerdozi di Crist (Eb 7,1.3).
Come curiositât storiche, la Ninive pecjadorie che Gjone al à di convertî, e jere stade fiscade inmò dal 612 e cuant che l’autôr al scriveve e jere dome un ricuart lontan.