Il libri di Ezechiel
Predi di Gjerusalem, Ezechiel al fo depuartât in esili a Babilonie, là che al esercità il so ministeri dificil fra il 593 e il 571 p.d.C. par riclamâ i gjudeus deludûts e disperâts a la lôr responsabilitât morâl inte tragjedie de nazion, capitade par colpe des lôr infedeltâts tai confronts di Diu. La sô ativitât duncje e je stade in part contemporanie a chê di Gjeremie.
Sintût dal fruç de citât sante dal 587, il profete al è dut cjapât de sô mission di rincorâ i esiliâts e di disponiju a la sperance de salvece imprometude di Diu. Di fat Diu, come che al è stât di peraule tal cjastiâ la colpe, e le veve professade, cussì al sarà di peraule tal tornâ a meti in pîts il so popul.
A diference di Isaie, scrit di plui autôrs, e di Gjeremie, componût in plui tocs, il libri di Ezechiel si presente in biel ordin. Lis sôs profeziis a son segnadis cun precision di timp e di lûc e al à une preference uniche pal simbolisim, pe alegorie e pe inmagjin.
La vore si vierç cu la clamade profetiche (cc. 1-3) e po si divît in cuatri parts:
I. cridadis e minacis cuintri dai fîs di Israel prime che Gjerusalem e vegni sidiade (cc. 4-24);
II. sentencis cuintri dai forescj ch’a àn strissinât il popul di Diu fûr di troi (cc. 25-32);
III. intant e dopo dal sidiament, il profete al confuarte il so popul imprometint un avignî plui biel (cc. 33-39);
IV. prevision dal statût politic e religjôs de comunitât future che si sistemarà te Tiere sante (cc. 40-48).
Jessint predi, Ezechiel al fâs dal templi la sô preocupazion primarole: tant il templi di cumò, contaminât di usancis sporcjis e bandonât de glorie dal Signôr, che il templi futûr, perfet ancje inte struture matereâl, là che Diu al tornarà a meti la sô glorie.
Dongje de passion pal templi e pe leç, Ezechiel al palese un gust particolâr pes visions plui stranis e fantasiosis. Nissune maravee che i esegjets lu vedin metût fra i precursôrs e i fondatôrs de leterature apocalitiche, cui siei nemâi mitologjics (i cuatri nemâi che la tradizion e atribuìs ai cuatri vanzei a son siei), insieme cun Denêl e cu l’Apocalìs di Zuan, ch’e à cun chest libri une grande colegance.
Cul so insisti, in linie cun Gjeremie, su la spirtualizazion dal cult e de religjon, su la separazion clare dal sacri e dal profan, Ezechiel al dà vite a chê corint spirtuâl che, passant pal gjudaisim, e larà a finîle drete tal GT. Gesù al è il bon pastôr che Ezechiel al veve nunziât e al à screât chê religjon dal cûr e de cussience che lui al veve invocade cun tante passion.
Di chi, insieme cul so inmagjinific straordenari, la atualitât di chest predi e profete.