Il libri dal Esodo
Al è il libri che al va in dilunc cu la storie de Gjenesi. I ebreus lu clamin We-elleh shemôt (= Chescj a son i nons). Al conte, tun implant storic e liturgjic, ce che ur à sucedût ai ebreus che, di sclâfs che a jerin e distinâts al svinidriment (ur copavin i fruts e ur fasevin fâ lis voris plui griviis), a son deventâts oms libars e in stât di dâ dongje cul jutori di Diu, un vêr popul. Menâts di Mosè, i ebreus si jerin slontanâts dal Egjit (il faraon, par colpe des dîs plais al veve scugnût rindisi a la fuarce di Diu e lassâju lâ), a vevin passât il mar Ros (o, miei, il mâr des Cjanussis) e a vevin frontât il desert. Rivâts a la mont dal Sinai, Diu al veve fat cun lôr il pat (che al veve dentri ancje i dîs comandaments), cun Mosè che al faseve di mediator.
Diferent de Gjenesi, l’Esodo nol è ben spartît e inmaneât tes sôs parts.
Al à dentri tocs di storie, tescj liturgjics e leçs. Dut chest matereâl lu àn metût adun a planc a planc, peant insieme matereâl leterari dai scrits Jahvist e Elohist e zontant, dopo, matereâl dal scrit Sacerdotâl.
Il scrit plui antîc (Jahvist), contant l’Esodo, al à volût meti in lûs che ogni fat che al sucêt al è un “spieli”, un “segnâl” che Diu al met in vore, parie, la salvece di Israel, e tal stes timp une “prove” là che si à di restâ fedêi al Signôr.
Il scrit Elohist al bat sul teme teologjic di Diu che i palese a Mosè il so non (jhwh), il teme dal leam di amôr (pat, aleance) fra il Signôr e il so popul e, par finî, il grant ecuilibri che al è jenfri la leç naturâl e chê rivelade (sedi leç sociâl che religjose e liturgjiche).
Chel che al à metûts adun e comedâts i doi scrits al à metût in lûs il teme dal pat che al va rispietât, se no si vûl vê il cjastic di Diu.
Il scrit Sacerdotâl al à invezit metût in lûs la presince seguitive di Diu framieç dai siei fedêi.
Come in altris libris de Bibie, al è impuartant ancje culì il scrit Deuteronomist
Il libri dal Esodo al è, par cont di teologjie, un dai tescj plui saurîts e pençs dal Vieri Testament.