La seconde letare ai Corints
Chê che vuê si clamile seconde letare ai Corints e je l’ultime vore che Pauli i à tramandât a la glesie de citât di Corint. E di fat al fevele di une letare scrite prime “tun mâr di lagrimis” cul fin di fâ tornâ in strade i siei cristians (2,3-4.9; 7,8.12). Trê situazions o fats gnûfs a motivin cheste letare e a saran ancje l’argoment pastorâl ch’al tratarà Pauli.
1. I berdeis saltâts fûr jenfri Pauli e i cristians di Corint, là che e à cjapât pît une clape contrarie al missionari ch’al à plantade la glesie. Alore Pauli al sclarìs i siei progjets, il so stîl e il so mût di regi une comunitât (1,12-24; 2,12-7,4). Al ricognòs che i cristians di Corint, dopo de sô letare “tes lagrimis”, si son comedâts e a àn cjapât provediments tai confronts de clape ch’e semenave il disvari. Cumò ju pree di vê boncûr e di perdonâur a di chei ch’a àn falât (2,1-11; 7,5-16).
2. Si à di fâ une cuestule pes glesiis puaris di Gjerusalem e Pauli ur dà istruzions pratichis e motivazions ideâls in merit, racomandant i “fradis” cristians ch’a varan di ingrumâ lis ufiertis des glesiis par puartâlis in Gjudee (8,1-9,15).
3. Al fronte il cantin dai “arciapuestui”. Ur dà chest non ironic a di chei ch’a àn stiçât la comunitât cuintri di lui, screditant la sô autoritât di apuestul e il so sisteme di puartâ la biele gnove. Ju vise ancje ch’al tornarà pal tierç viaç a Corint e al sigure i cristians che cheste volte al sarà rissolût cuintri di chei che no àn mudade vite e ch’a van indenant cui disordins di prin (11,1-13,10).
La letare si vierç, come dutis chês altris, cu la direzion – cui ch’al scrîf, a di cui e salût – e si siere cu lis racomandazions e cui salûts prin di lassâsi (1,1-2; 13,11-13).
Dopo dal salût di jentrade, Pauli al met une “preiere di laut a Diu” che lu à confuartât e sfrancjât di une grande tribulazion capitade vie pe Asie (1,8). Lant dilunc, ur dà cualchi informazion sui siei viaçs: al è partît di Efeso (Asie), al è rivât te comunitât cristiane di Troade e po al è lât te Macedonie, a Filips. Li al à cjatât finalmentri Tito, che i à dadis buinis gnovis a rivuart de comunitât di Corint (7,5-7). Sicheduncje la letare al pò vêle mandade dome de Macedonie, di Filips, cualchi an dopo de prime letare ch’o vin sotman, tant a dî tor la metât dai agns cincuante (55/56 d.d.C.).
Ancje cheste vore di Pauli, che la tradizion le à tignude cont, e je un test impuartant par cognossi Pauli e il mes cristian. E je un litrat dal rapuart che l’apuestul fondatôr al à cu la comunitât. E je metude in plene lûs la figure umane e spirituâl di Pauli, ma ancje il so telâr teologjic e il struc di dutis lis sôs vitis di apuestul: la fede in Gjesù, metût in crôs e ricognossût tant che Crist e Signôr.