Il libri di Baruc
La Bibie ebraiche no acete chest libri tal so cjanul. Stant a l’introduzion (1,1-14), lu varès scrit Baruc, il segretari di Gjeremie, a Babilonie dopo de depuartazion e mandât a Gjerusalem par che lu leiessin tes sembleis liturgjichis. Però il contignût e il stîl a consein di metilu fra i libris plui resints de Bibie, adiriture tor la metât dal I sec. p.d.C., cuant che e veve cjapât pît l’usance di butâ fûr voris anonimis dant la paternitât a personis une vore cognossudis.
Il libri, conservât dome in grêc, al è fat di tocs diferents. Al à une preiere di confession e di sperance (1,15-3, 8); un poeme sapienziâl (3,9-4,4) là che la sapience e je identificade cu la leç; un toc profetic (4,5-5,9) là che Gjerusalem personificade ur fevele ai esiliâts e là che il profete al dà spirt riclamantsi a lis sperancis messianichis.
L’impuartance di chest librut e sta tal fat che nus vierç un barcon su la vite de comunitât dispierdude e nus mostre cemût che la vite religjose si jere mantignude in gracie dai contats mai cjonçâts cun Gjerusalem, de preiere, dal rispiet pe leç e des visions di sperance messianiche pandudis dai profetis. Di chi ancje la sô atualitât te “dispersion” culturâl di vuê.
Il libri si siere (c. 6) cuntune letare atribuide a Gjeremie ma scrite plui in ca. E je une satire tremende cuintri la religjon dai idui e l’adorazion di ce che nol è Diu; un teme classic de predicazion dai profetis.