Il libri di Agjeu
Cun Agjeu e scomence l’ultime ete profetiche, chê dopo l’esili. E si visisi a colp dal gambiament. Prin dal esili la peraule di ordenance dai profetis e jere “cjastic”. Intant dal esili e jere “consolazion”. Cumò e je “ristaurazion”.
Agjeu al capite tun moment decisîf pe formazion dal gjudaisim: la nassite de gnove comunitât in Gjudee.
Lis sôs esortazions, curtis, a son datadis de fin di avost a metât di dicembar dal 520 p.d.C.
I prins gjudeus, rimpatriâts di Babilonie par tornâ a fâ sù il templi, a stan pierdint il lôr spirt pai masse stralencs che ur vegnin metûts di ogni bande. Agjeu e Zacarie ju invoin a ripiâ dut il lôr coragjo e a sburtin il governadôr Zorobabel e il prin predi Gjosuè a tornâ a inviâ lis voris dal templi.
Il struc al è chest: stant che il templi al è dut in ruvine, il Signôr al à cjastiade la tiere; tornant a fâ sù il templi, si varà furtune ancje matereâl. La costruzion dal templi e je presentade come condizion par che il Signôr al vegni a meti in vore il so ream. Ator dal santuari e dal dissendent di David si pee la sperance di un Messie che no s’intardarà trop.