Notiziis e avîs

DE CUNVIGNE INMANEADE DAL GRUP DI GLESIE FURLANE
UNE PROPUESTE DI LETURE GNOVE PAR CAPÎ MIÔR CEMÛT
CHE IL CRISTIANISIM SI È SLARGJÂT TES TIERIS DI AQUILEE

Pai cristians dal Friûl, al à dit bons. Schiff, la glesie
mari di Aquilee e reste un pont di riferiment
unic e insostituibil te pastorâl diocesane

LA CUNVIGNE di studi su Aquilee dade dongje dal grup di Glesie Furlane e tignude a Udin sabide ai 2 di Dicembar te sale Pauli Diacun e à lassât intai partecipants il gust di tornâsi a cjatâ. A son chei incuintris che ti sticin il gust de tô storie, ti madurin, ti dan dignitât umane e cristiane. L’incuintri su «Metodo e fonti per la ricostruzione della propagazione del Cristianesimo ad Aquileia» al à inmaneât une leture gnove de archeologjie, de iconografie e de agjografie de Basiliche par capî miôr cemût che il cristianisim si è slargjât tes tieris di Aquilee. Si à començât cul salût dal dean di Glesie Furlane, Zuan Pieri Biasatti, che al à presentât spirt e iniziativis dal grup. Bons. Igino Schiff, vicjari pe pastorâl de Arcidiocesi di Udin, al à puartât il salût dal Arcivescul, bons. Pietro Brollo, e al à laudade l’azion di Glesie Furlane. Pai cristians dal Friûl, al à continuât bons. Schiff, la glesie mari di Aquilee e reste une risultive e un pont di riferiment unics e insostituibii te pastorâl diocesane e tal mont globalizât di vuê. Al à daspò puartât il so salût Arnaldo Becci, dean de Fondazion «Società per la conservazione della Basilica di Aquileia ». Prime di dâ la peraule ai relatôrs il pinsîr al è lât aes personis che nô vuê o gjoldìn dai lôr studis: in mût particolâr pre Bepo Marchet, bons. Guglielmo Biasutti, pre Checo Placerean, pre Gilberto Pressacco e pre Vigji Marcuç, za plevan di Aquilee. Lis relazions de cunvigne a son stadis une vore interessantis. Remo Cacitti, de Universitât dai studis di Milan, al à fat un excursus li che partint des origjinis dal cristianisim al à metût in lûs i grancj oms che a àn dade une interpretazion storiche ai aveniments de Glesie di Aquilee dal inizi fin in zornade di vuê. Aurora Cagnana, de Sorintendence archeologjiche di Gjenue e che e à lavorât par agns in Friûl, nus à presentade une cerce di ce che i sgjâfs, un muret, i claps a tramandin dai
prins insediaments dal cristianisim: tesaurs sparniçâts des monts fint al mâr e che la nestre tiere ancjemò tancj indi plate e e custodìs. Intant al è rivât misdì: un moment di soste, un ghiringhel insieme, e po la seconde part de cunvigne. Gabriele Pelizzari, de Universitât dai studis di Milan, un zovin che di agns in ca al scrutine l’aule sud de glesie di Aquilee, nus à presentade midiant diapositivis la Sale teodoriane e nus à dade une olme di une sô prossime publicazion sul mosaic de Basiliche. Alessio Persic de Universitât catoliche di Milan al à cjacarât dai martars aquileiês, de «rusticitas » e di Aquilee pont di riferiment dal monachisim in Ocident. E steve rivant aromai la gnot e si sin saludâts. Tornant cjase tancj pinsîrs mi balinavin in cûr: o riviodevi i grancj oms de Glesie di Aquilee e cussì, intant che l’An liturgjic si sfantave tal scûr (tal doman e jere la prime domenie di Avent), la glesie mari cuasi e riviveve no viele e lontane, ma creature gnove, frescje, biele, che e plâs e che inamore in zornade di vuê. Aquilee e continue a restâ segnâl pes grandis domandis che a compagnin la nestre religjon: il misteri dal Profete di Nazaret, l’identitât de proprie glesie, il valôr des piçulis comunitâts, l’evangjelizazion… Tes croseris dal mont di vuê, jê nus da la direzion, nus segne la strade di fâ. Un grazie ai relatôrs e a chei che a àn organizade la cunvigne. In chest incuintri forsit o vin fate ancje nô l’esperience dai «rustics» di mil e sietcent agns fa. Lôr, partîts de campagne a jentravin te Aule teodoriane e a restavin cence flât in tant sflandôr. Jessûts, dopo di vê contemplâts tal mosaic dal paviment i misteris cristians, a tornavin cjase cun alc di grant in cûr. Cussì al è stât e al reste ancje par nô. No sai se lant vuê te glesie di Aquilee o prearès o no, parcè che l’ambient, cemût che al è stât ridusût, no mi invide plui a preâ. Dut in chel lûc al cjacare di art e di storie ma jentrant no mi cjati plui tal misteri, no ai plui un puest dulà inzenoglâmi a contemplâ. Par chest cumò, cjalant a la cunvigne, o preferìs pensâ a Rufin, Jeroni, Valerian, Atanasi e in chest svicinâsi dal Nadâl a Cromazi che nus dîs ancje vuê: «Crist al à cjapât sù di noaltris ce che al è nestri, par podênus regalâ ce che lui al è».