VANZELI DA L’INFANZIE
L’ufierte de vedue
21 1 Cjalantsi ator, al viodè un pôcs di siôrs ch’a butavin lis lôr ufiertis tes casselis dal templi. 2 Al viodè ancje une vedue puare che e butave dentri dôs palancutis. 3 Alore ur disè: “Us al dîs in veretât: cheste vedue, puare come ch’e je, e à ufiert plui di ducj chei altris. 4 Di fat ducj chei chi a àn dât in ufierte une part di ce che ur vanzave, cu la cuâl che cheste puare femine e à dât, te sô miserie, dut ce che i coventave par vivi”.
Profezie de distruzion dal templi
Mt 24,1-3; Mc 13,1-4
Discors escatologjic
5 Stant che cualchidun al fevelave dal templi e al diseve ch’al jere une vore biel pes pieris e pai regâi di avôt che lu furnivin, al disè: 6 “A vignaran zornadis che dut ce ch’o stais cjalant al vignarà sdrumât e no restarà piere sore piere”. 7 Alore lu interpelavin: “Mestri, cuant sucedaraial dut chest e cuâl saraial il segnâl ch’al sta par sucedi?”.
Mt 24,4-14; Mc 13,5-13
I segnâi di avîs
8 Gjesù ur disè: “Stait atents di no lassâsi imbroiâ. Parcè che a vignaran in tancj e si presentaran a gno non disint: O soi jo, e: Il moment al sta rivant. Vualtris però no stait a lâ daûr di lôr. 9 Cuant che o sintarês a fevelâ di vueris e di rivoluzions, no stait a vê pôre. Di fat chestis robis a scuegnin sucedi, ma nol vûl dî che subit dopo e sarà la fin”.
10 Alore ur diseve: “Un popul al jevarà cuintri di un altri popul e un ream cuintri di un altri ream. 11 A saran pardut taramots, miseriis e pestilencis; a saran ancje spiei di fâ spavent e grancj segnâi dal cîl. 12 Ma prin di dut chest, us cjaparan cu la fuarce e us perseguitaran, consegnantjus tes sinagoghis e tes presons, strissinantjus denant dai lôr rês e dai lôr governadôrs, par colpe dal gno non. 13 In chê volte o varês ocasion di dâmi testemoneance. 14 Us siguri che no vês di bacilâ par chel che o disarês par parâsi; 15 jo in persone us darai lengaç e sapience, di mût che i vuestris nemîs no podaran ni tignîus teste ni rispuindius. 16 O sarês tradîts parfin dai gjenitôrs e dai fradis, dai parincj e dai amîs, e une vore di vualtris a saran copâts; 17 o sarês odeâts di ducj par colpe dal gno non. 18 Cun dut a chel, nancje un cjaveli dal vuestri cjâf nol larà pierdût. 19 O salvarês lis vuestris animis cul tignî dûr.
Mt 24,15-21; Mc 13,14-19
Il distin di Gjerusalem
20 Cuant che o viodarês Gjerusalem cerclade dai esercits, alore tignît aments che la sô ruvine e je dongje. 21 In chê volte chei ch’a son te Gjudee ch’a scjampin su pes monts, chei ch’a son in citât ch’a scjampin fûr e chei ch’a son te campagne che no tornin in citât; 22 parcè che chescj a son dîs di vendete, par che si colmi dut ce ch’al è stât scrit.
23 Puaris mai chês feminis ch’a spietin e chês ch’a dan di tete, in chei dîs; di fat e capitarà grande tribulazion in te tiere e svindic cuintri di chest popul. 24 A colaran sot de spade e a saran menâts vie sotans framieç di ducj i popui; Gjerusalem e sarà tibiade dai paians, fin che no si colmaran i timps dai paians.
Mt 24,29-31; Mc 13,24-27
Gjesù al tornarà tant che judiç di ducj
25 A saran segnâi tal soreli, te lune e tes stelis; e su la tiere disperazion di popui fûr di sè pal sunsûr dal mâr e des ondadis. 26 I oms a muraran pe pôre e in spiete di ce ch’al varà di capitâ su la tiere. Di fat lis fuarcis dai cîi a saran savoltadis.
27 In chê volte a viodaran il Fi dal om a vignî suntun nûl cun grande potence e sflandôr.
28 Cuant che a scomençaran a capitâ chestis robis, jevait sù e alçait il cjâf, parcè che la vuestre liberazion e je dongje”.
Mt 24,32-35; Mc 13,28-31
La parabule dal fiâr
29 Po ur disè une parabule: “Cjalait il fiâr e ducj chei altris arbui. 30 Cuant che o viodês ch’a tachin a butâ fûr, o capîs che l’istât al è aromai dongje. 31 Cussì ancje vualtris, cuant che o viodarês a capitâ chestis robis, o vês di savê che il ream di Diu al è dongje. 32 Us al dîs in veretât: no passarà cheste gjernazie prime che dut chest al capiti. 33 Il cîl e la tiere a passaran, ma lis mês peraulis no passaran par mai.
Mt 24,48s; Mc 11,11.19
Esortazion a veglâ
34 Stait ben atents che i vuestris cûrs no si inçussissin in baldoriis, in cjochis e in preocupazions pes robis matereâls, e che chê zornade no us plombi intor a tradiment; 35 e plombarà come un laç sun ducj chei ch’a vivin su la face de tiere. 36 Veglait e preait di un continui, par vê la fuarce di scjampâ denant di ducj chescj mâi ch’a stan par capitâ e par presentâsi denant dal Fi dal om”.
37 Vie pal dì al insegnave tal templi e di gnot al jessive e le passave fûr, su la mont Ulive. 38 E dut il popul al leve tal templi denant dì par scoltâlu.
Mt 26,2-5; Mc 14,1-2; Zn 11,47-53