LIS PROVIS DAL JUST
Tubie al vuarìs
11 1 Si sdongjavin di Kaserin, in face di Ninive. 2 Dissal Rafael: “Tu sâs in ce cundizions ch’o vin lassât to pari; 3 anìn denant de tô femine par lâ a preparâ la cjase, biel che jê e rivarà cun chei altris”. 4 A cjaminarin ducj i doi insieme. Po Rafael i disè: “Cjape in man la fêl”. Il cjan ur leve daûr. 5 Ane e jere sentade a tignî di voli la strade ch’al sarès rivât so fî. 6 I semeà di sintî ch’al jere lui, e i disè al pari di lui: “Ve to fi ch’al rive cul so compagn!”. 7 Rafael i disè a Tubiute, prime ch’al fos rivât li di so pari: “Ti garantìs che i vôi di to pari si spalancaran. 8 Tu i metarâs parsore dal voli la fêl dal pes: la midisine i intacarà e i gjavarà vie dai vôi une pielute blancje. E to pari al cessarà di jessi vuarp e al viodarà la lûs”. 9 Ane e petà fûr di corse a butâsi tor dal cuel dal so frut e i disè: “Cumò o pues ancje murî, che ti ài tornât a viodi!”. E e tacà a vaî. 10 Tubie al jevà sù, ch’al clopave, ma al rivà adore di strissinâsi fin sul puarton dal curtîl. 11 Tubiute i lè incuintri tignint in man la fêl dal pes. I soflà tai vôi e i disè, biel che lu tignive strent: “Coragjo, pari!”. Daspò i metè la midisine e le lassà une dade; 12 cu lis mans i tirà fûr une pielute dal cjanton dai vôi. 13 Alore so pari lu cjapà a bracecuel e si metè a vaî. Al berlà: “Ti viôt, fi gno, spere dai miei vôi!”. 14 E al disè: “Benedet seial Diu! Benedet seial il so non tant grant! Benedets sedino ducj i siei agnui sants! Benedet seial il so non tant grant par ducj i secui! Parcè che mi veve dât jù e al à vût dûl di me e o rivi a viodi gno fi Tubiute!”. 15 Tubiute al jentrà in cjase e al benedive Diu scriulant di gjonde. Po i contà dut a so pari, pont par pont: che il viaç i jere lât tant ben che mai, ch’al veve tornât a puartâ indaûr i bêçs, e di Sare fie di Raguel, che le veve sposade e ch’e stave rivant e ch’e jere aromai dongje, a lis puartis di Ninive. 16 Alore Tubie al partì par lâ incuintri a sô brût de bande des puartis di Ninive, laudant Idiu plen di gjonde. Cuant che la int di Ninive lu vioderin a cjaminâ cence che nissun lu compagnàs e a lâ indenant cul vigôr di une volte, a restarin cence peraule. Tubie al contà a ducj che Diu al veve vût dûl di lui e che i veve vierzûts i vôi. 17 Podopo Tubie si sdongjà di Sare, la femine di so fi Tubiute, e le benedì cussì: “Benvignude, fie mê! Benedet seial il to Diu che ti à fate vignî in cjase nestre, frute mê! Benedet seial to pari, benedet seial gno fi Tubiute e benedete ancje tu, fie mê! Benvignude in cjase nestre, te gjonde e te benedizion! Jentre, fie mê!”. 18 In chê dì e fo grande fieste par ducj i gjudeus di Ninive, 19 e i siei cusins Achikar e Nadab a vignirin ancje lôr a cjapâ part a la ligrie di Tubie. 20 E a faserin fieste pes gnocis di Tubiute par siet dîs, cun grande gjonde.