La parusie dal Signôr e dal trist
2 1 Cumò us preìn, fradis, sul cont de vignude dal Signôr nestri Gjesù Crist e de nestre riunion cun lui, 2 di no lassâsi impressionâ cussì a la svelte tal vuestri spirt e nancje spaventâ par vie di rivelazions profetichis, di discors o di une letare che us varessin mandade nô, come se la zornade dal Signôr e fos propit par rivâ. 3 Nissun nol à di imbroiâus e in nissun sisteme! Di fat prime e à di rivâ l’apostasie e al à di palesâsi l’om de inicuitât, il fi de condane, 4 chel che si met cuintri e si alce parsore di dut ce ch’al è clamât Diu o al ven preât, fint a sentâsi lui tal templi di Diu, spaçantsi sè par Diu .
5 No si visaiso che, cuant che o jeri inmò framieç di vualtris, us ài ditis dutis chestis robis? 6 E cumò o savês ce che lu ten frenât, par che si palesi cuant che e sarà la sô ore. 7 Di fat il misteri de inicuitât al è za in vore. Dome che si à di spietâ fin cuant che nol è gjavât vie chel che lu ten frenât. 8 Propit in chê volte si palesarà il trist e il Signôr Gjesù lu fruçarà cu la soflade de sô bocje e lu fasarà sparî cu la manifestazion de sô vignude. 9 La vignude dal trist e ven par opare di satane, cun ogni sorte di potence, e cun meracui e spiei di falsetât, 10 cun ducj i imbrois de inicuitât, par chei che si pierdin propit parcè che no àn acetât l’amôr de veretât che ju varès salvâts. 11 Ve il parcè che Diu ur mande une fuarce di falsetât par ch’a crodin a la bausie, 12 par ch’a sedin condanâts ducj chei che no àn crodût a la veretât ma si son butâts de bande de inicuitât.
Tignî dûr
13 Nô però o vin di ringraciâ Diu di un continui par vualtris, fradis benvolûts dal Signôr, parcè che Diu us à sielzûts ancjemò dal principi par salvâus te santificazion dal Spirt e te fede de veretât. 14 Propit a chest us à clamâts midiant dal nestri vanzeli, par rivâ a cjapâ la glorie dal Signôr nestri Gjesù Crist.
15 Alore, fradis, stait salts e tignît cont des tradizions che o sês stâts istruîts, tant midiant de nestre vôs vive che de nestre letare. 16 E Gjesù Crist nestri Signôr in persone e Diu nestri Pari che nus à volût ben e nus à dade une consolazion eterne e une buine sperance, pal so boncûr 17 al confuarti e al confermi i vuestris cûrs in ogni opare e peraule buine.