Prime digression
Cuint confront (al finis)
Muart dai nemîs e salvece dai juscj
19 1 Sui triscj e jere prontade fin tal ultim une rabie
cence dûl di sorte;
parceche e saveve di lôr ancje ce ch’a varessin fat;
2 che lôr, dopo di vêju lassâts partî
e di vêju parâts fûr in presse,
gambiade idee, ur varessin corût daûr.
3 Difat, biel ch’a jerin ancjemò in corot,
e che si lamentavin su lis tombis dai lôr muarts,
ur à fat pierdi il cjâf un altri resonament fûr di scuare:
chei che, preantju, ju vevin sovâts,
propit a di chei ur àn corût daûr come ch’a fossin scjampâz.
4 Ju à strissinâts a di chel tant un distin just,
che ur à fat dismenteâ ce ch’al jere sucedût,
par ch’a colmassin il cjastic
che ur mancjave ancjemò ai lôr torments,
5 e intant che il to popul al scomençave
un viaç straordenari,
lôr a cjatassin une muart mai sintude.
Seste digression
La creazion tanche strument di Diu
6 Dute la creazion, tal so jessi,
e tornave a cjapâ il stamp di prime,
ubidint ai tiei ordins,
par che i tiei fîs a fossin vuardâts cence nissun mâl.
7 Il nûl al cuviergeve cu la ombrene il campament;
là che prin e jere l’aghe, e je comparide la tiere sute,
une strade libare tal mâr Ros
e des ondis savoltadis une planure dute verde.
8 Par li al è passât dut il popul,
chei che la tô man ju protegeve,
ch’a viodevin robononis di restâ.
9 A son stâts menâts a passon tanche pujeris
e tanche agnei a saltuçavin ca e là,
laudanti te, Signôr, che tu ju vevis liberâz.
10 Si visavin inmò di ce ch’al jere sucedût tal esili,
cemût che la tiere, impen di rassis diferentis di nemâi,
e veve butât fûr moscjis,
e il flum, impen di nemâi di aghe,
al veve gomitât un stragjo di croz.
11 Plui in ca e àn viodût ancje une rasse gnove di ucei,
cuanche, pocâts de gole,
e àn domandât mangjative plui fine;
12 parceche, par sodisfâju, a son vignudis sù dal mâr lis cuais.
13 Sui pecjadôrs invessit a son plombâts i cjastics,
no cence di jessi stâts provâts prin de fuarce dai folcs;
lôr e àn patît, come ch’al jere just, pe lôr tristerie:
difat e àn nudride l’asse plui tremende pal forest.
14 Par dî il vêr, chescj no vevin vierzudis lis puartis
a int foreste che si presentave,
ma chei altris a vevin ridusût in sotanance ospiz
che ur vevin fat dome ben.
15 No dome, ma se si varà cualchi remission, e sarà par chei
ch’a viergevin la puarte di nemîs dome ai forescj.
16 Ma chescj, dopo di vêur spalancât il cûr ai ebreus
cun tant di fieste
e di vêur fat spartî i lôr stes dirits,
ju àn maltratâts condananju a lavôrs dûrs cence fin.
17 Par chel a son stâts svuarbâts,
come chei altris su la puarte dal just,
cuanche, invuluçâts dal scûr plui penç,
ognidun al leve cirint la jentrade de sô puarte.
18 Difat i elements di fonde si cumbinavin fra di lôr,
come lis notis ch’a mùdin il sun intun’arpe,
mantignint simpri il stes intono,
come che si pò capî benon
resonant sun ce ch’al è sucedût:
19 difat, nemâi di tiere si tramudavin in nemâi di aghe,
e chei ch’a nadavin a passavin su la tiere,
20 il fûc, ta l’aghe, al cresseve la sô fuarce
e l’aghe e dismenteave la sô virtût di distudâlu;
21 a l’incontrâr, lis flamis no brusavin lis cjârs
dai nemaluts che ur balinavin dentri
e no disfavin une mangjative dal cîl,
sul stamp de gilugne, che si dislît tun lamp.
Conclusion
22 In dut, Signôr, tu às fat grant il to popul
e tu lu às colmât di glorie
e no tu lu às trascurât,
compagnanlu in ogni timp e in ogni lûc.