LA SAPIENCE REGULE DI VITE
Prime digression
Esortazion a la justissie
18 1 Pai tiei sants, invessit, al jere dut un lusôr;
i egjizians, sintint la lôr vôs ma cence viodiju in muse,
ju clamavin furtunâts, parceche no pativin chês penis;
2 ju ringrassiavin parceche,
seben che ofindûts par prins,
no si svindicavin
e a domandavin perdon di jessiur stâts nemîs.
3 Impen di chês robis, tu ur às dade une colone sflameant,
che ju indreças par chê strade che no cognossevin,
e che ur fases lûs, ma cence scotâju, tal lôr viaç di glorie.
4 Chei altris si mertavin mo di restâ cence lûs
e di jessi presonîrs dal scûr,
lôr ch’a vevin tignûts sierâts i tiei fîs
che midiant di lôr tu stavis par dâj al mont
la lûs de leç, che no si smamis.
Cuint confront
Muart dai nemîs e salvece dai juscj
5 Stant ch’a vevin distinât di copâ i fîs dai sanz
e midiant che un sôl fî al è stât esponût e salvât,
par cjastic tu ur às cjolte la sdrume dai lôr fîs
e tu ju às fats murî ducj insieme te aghe ch’e menave vie.
6 Chê gnot i nestris vons le vevin cognossude denant trat,
parceche, savint di sigûr a ce zuraments ch’a vevin crodût,
a vessin il cûr content.
7 Il to popul si spietave
la salvece dai juscj e la ruvine dai nemîs.
8 Parceche come che tu às cjastiâts i aversaris,
cussì tu nus às puartâts nô, clamantnus cun te.
9 I sants fîs dai bogns, di scuindon, a ufrivin il sacrifici
e ducj insieme si àn imponude la leç di Diu:
che i sants a varessin spartît te stesse misure
la lôr furtune e i pericui,
cjantant prin lis lauts dai vons.
10 Al faseve revoc il vosarili stonât dai nemîs
e si slargjave il lament di chei ch’a vaivin i lôr fîs.
11 Cu la stesse sentence
al jere svindicât insieme il famei e il paron
e l’om dal popul al pative lis stessis robis dal re.
12 Ducj compagns, midiant de stesse muart,
a vevin un disordin di muarz;
difat i vîs no jerin avonde par soterâju
parceche, intun batût di voli, la lôr gjernazie plui nobil
e je lade in fruç.
13 Chei che no vevin volût crodi a nuje parvie dai strolegheçs,
a la muart dai prins fîs e àn confessât
che il popul al è fî di Diu.
14 Biel che un cidinôr cujet al invuluçave dutis lis robis
e la gnot e jere a mieç dal so cors,
15 la tô peraule ch’e pò dut, dal cîl,
des sentis reâls,
tanche un vuerîr che no si lasse pleâ,
si è butade framieç di chê tiere di svinidriment,
puartant, tanche spade uçade,
il to decret che nol pò tornâ indaûr.
16 Fermade, e à jemplât dut il mont di muart;
e tocjave il cîl e a cjaminave su la tiere.
17 Alore ju àn scaturîts siums trements comparîts a colp,
ur son capitadis poris che no s’es spietavin
18 e, sgnacâts ca e là mieçs muarts,
a palesavin la colpe de lôr muart:
19 i lôr siums teribii ju vevin visâts prin
par no ch’a murissin cence savê il parcè
dal lôr tant tribulâ.
Cuinte digression
La muart dai israelits intal desert
20 La prove de muart e à tocjât ancje i juscj
e tal desert al è stât un maçalissi di int;
ma la rabie di Diu no à durât a lunc,
21 parceche un om cence pecjât al à spesseât a parâju:
puartant lis armis dal so servissi,
prejere e incens di espiazion,
al à frontade la rabie di Diu e al à fermât il flagjel,
mostrant ch’al jere to famei.
22 Lui al à vinçude la rabie di Diu no cu la fuarce dal cuarp,
ni cu la potence des armis,
ma cu la peraule al à bonât chel ch’al cjastiave,
puartant indenant i zuraments fats ai vons e il pat.
23 Za i muarts si ingrumavin un parsore chel altri
cuanche lui, stant tal mieç, al à fermade la rabie
e j à tajade la strade viers dai vîs.
24 Su la lungje tonie al jere il mont intîr,
tal intai des cuatri riis di pieris pressiosis
lis gloriis dai vons
e su la corone dal so cjâf la tô majestât.
25 Denant di chest,
il sterminadôr al à cessât e al à vude teme,
parceche une cerce de rabie di Diu e jere biel che avonde.