LA SAPIENCE REGULE DI VITE
Prime digression
Esortazion a la justissie
16 1 Par chest a son stâts cjastiâts, come ch’a mertavin,
cu lis stessis robis
e a son stâts lambicâts di un stragjo di bestiis.
2 Invessit di chest cjastic, tu j às fat un ben al to popul;
par saceâ la sô grande brame,
tu j às prontât un mangjâ di un savôr fenomenâl, lis cuais,
3 par che chei ch’a bramavin la bocjade,
ingomeâts des bestiis mandadis cuintri,
a pierdessin ancje chê fan ch’e jere naturâl,
cu la cuâl che chescj, restâts pôc timp cence,
si sostentassin cun tune mangjative speciâl.
4 Al coventave mo che sun chei prepotenz
ur plombas intôr une miserie che no podevin fuîle,
e che chescj dome a viodessin
cemût ch’a jerin tormentâts i lôr nemîs.
Tierce digression
Il flagjel dai sarpinz
5 Cuanche difat e je plombade sun lôr la rabie
discjadenade des bestiis
e a murivin muardûts dai sarpints velenôs,
la tô fumate no à durât fintremai sul ultim.
6 A son stâts tormentâts cul fin di coregiju e par pôc timp,
vint vût un segnâl di salvece
par ricuardâur il comandament de tô leç.
7 Difat chel che si girave di chê bande,
nol jere salvât di ce ch’al cjalave,
ma di te, che tu salvis ducj.
8 Ancje cun chest tu às convint i nestris nemîs
che tu tu sês chel ch’al sfrancje di ogni disgracie.
9 E difat ju àn copâts lis becadis dai zupets e des moscjis
e no àn cjatât un rimiedi pe lôr vite,
parceche a mertavin di jessi cjastiâts di chês bestiis li;
10 ma i dincj dai sarpints velenôs no àn vinçût i tiei fîs
parceche si è intrometût il to boncûr e ju à vuarîz.
11 Par che ur restas il ricuart des tôs peraulis,
a jerin cjastiâts e dal moment vuarîts,
di pore che, colâts tune dismentie masse fonde,
a fossin lassâts fûr dai tiei benefissis.
12 No ju à vuarîts ni jerbe ni ongint,
ma la tô peraule, Signôr, ch’e vuaris dut.
13 Difat tu tu às podê su la vite e su la muart,
tu tu menis fint a lis puartis di chel altri mont
e po tu tornis a menâ indaûr.
14 L’om, te sô tristerie, al pò copâ,
ma nol pò tornâ a clamâ ca il spirt ch’al è jessût fûr
ni liberâ un’anime ch’e je stade sierade li dentri.
15 No si pò scjampâ de tô man.
TIERÇ CONFRONT
I elements atmosferics: cjastic e benefissi
16 I triscj, che no volevin savênt di cognossiti,
a son stâts cjastiâts cu la fuarce dal to braç,
batûts cun plois mai viodudis,
cun tampieste e cun burlaçs di sgrisulâsi
e incenerîts dal fûc.
17 E je une robe di restâ: cu l’aghe, ch’e distude dut,
il fûc al ardeve simpri plui,
parceche il mont intîr si met de bande dai juscj.
18 Cualchi volte mo la flame si bonave
par no incenerî i nemâi mandâts cuintri dai triscj,
e par che lôr, cjalant, a capissin
che ur stave sot il judissi di Diu.
19 Cualchi altre volte, ancje tal mieç da l’aghe,
la flame e brusave plui di ce ch’al vares podût il fûc,
par fiscâ i prodots di une tiere orende.
20 Il to popul invessit tu lu às nudrît cu la bocjade dai agnui
e tu às preparât par lôr, dal cîl,
un pan za pront, cence fadie,
in grât di dâur ogni contentece e di sodisfâur ogni gust.
21 Chê tô mangjative propit e palesave
cetant bon che tu sês cui fîs;
si adatave a la gole di chel che le mangjave,
si tramudave in ce che un al voleve.
22 Nêf e glace j tignivin dûr al fûc cence disfâsi,
par ch’a cognossessin che il fûc,
ardint framieç de tampieste
e sflameant framieç dai slavins,
al fruçave i prodots dai nemîs.
23 Ma chest, invessit, par ch’a podessin nudrîsi i juscj,
al dismenteave parfin la sô virtût.
Cuarte digression
La nature a servissi di Diu
24 Difat la creazion, ubidinti a ti, che tu le às creade,
le met dute par cjastiâ i triscj,
ma s’indolcis a pro di chei che si fìdin di te.
25 Par chest ancje in chê volte, adatansi a dut,
j ubidive al to don che dut al sostente,
seont la brame di chei ch’a vevin dibisugne,
26 par che i tiei fîs, che tu ur vuelis ben, Signôr, a imparassin
che no son lis svariadis pomis ch’a fàsin vivi l’om
ma e je la tô peraule ch’e ten in vite chei ch’a cròdin in te.
27 Difat ce che nol jere stât consumât dal fûc,
si disfave apene che un piçul rai di soreli lu sclipive,
28 par ch’a savessin ducj che si à di rivâ
a dîti grassie prin dal soreli
e incuintrâti cuanche al criche dì,
29 parceche la sperance dal ingrât
si disfarà tanche la gilugne dal unviêr
e si dispierdarà tanche aghe che no si pò doprâle.