ELI E SAMUEL
AZIONS DA L’ARCJE DI DIU
Il diu Dagon e l’arcje di Diu
5 1 Cuant che i filisteus a rivarin a strafuî l’arcje di Diu, di Eben-Ezer le menarin a Asdod. 2 I filisteus a cjaparin l’arcje di Diu, le puartarin dentri tal templi di Dagon e le plaçarin in bande di Dagon. 3 Cuant che la int di Asdod e jevà tal indoman a buinore e e vignì tal templi di Dagon, ve che Dagon al jere plombât jù par tiere, a muse, juste denant de arcje dal Signôr. E alçarin sù Dagon e lu tornarin a meti te sô place. 4 Ma cuant che a jevarin tal indoman a buinore, Dagon al jere indaûr colât jù par tiere a muse, denant de arcje dal Signôr, e il cjâf e lis dôs mans di Dagon a jerin abàs sul antîl, cjonçadis: tal so puest al jere dome il tronc di Dagon. 5 Al è par chel che i predis di Dagon e ducj chei che a jentrin tal templi di Dagon no balinin mai l’antîl di Dagon a Asdod ancjemò ore presint.
L’arcje di Diu e fâs stragjo
6 Il Signôr al cjalcjà la man parsore de int di Asdod: ju vuaià ben ben e ur mandà plen di bugnons a Asdod e tai borcs dulintor. 7 Cuant che la int di Asdod e viodè ce che al steve sucedint, a diserin: “L’arcje dal Signôr no à di restâ altri chi di nô parcè che la sô man si è induride cuintri di nô e cuintri dal nestri diu Dagon”. 8 A clamarin alore ducj i sorestants dai filisteus daprûf di lôr e ur diserin: “Ce vino di fâ alore de arcje dal Diu di Israel?”. Ur rispuinderin: “L’arcje dal Diu di Israel e à di lâ a Gat”, e a menarin vie l’arcje dal Diu di Israel. 9 Ma a pene menade vie, la man dal Signôr si fermà parsore de citât e a cjaparin un spac di voltâsi di sanc: la int de citât a forin ducj colpîts, dal plui piçul al plui grant, e ur capitarin plen di faronglis. 10 Alore a mandarin l’arcje di Diu a Ekron, ma co l’arcje di Diu e rivà a Ekron, i ekronits a tacarin a berlâ: “Mi àn menade dongje l’arcje dal Diu di Israel par finîmi me e il gno popul!”. 11 A clamarin a semblee ducj i sorestants dai filisteus e ur diserin: “Mandait indaûr l’arcje dal Diu di Israel; ch’e torni tal so puest e che no mi fasi murî me e il gno popul”. Veramentri in dute la citât e regnave une pôre di voltâsi di sanc, tant e jere cjalcjade la man di Diu. 12 Chei che no murivin a jerin fodrâts di bugnons e i berlis di disperazion de citât si sintiviju fint in cîl.