ELI E SAMUEL
AZIONS DA L’ARCJE DI DIU
Amicizie e aleance di Gjonate cun David
18 1 A pene che al finì di fevelâi a Saul, l’anime di Gjonate si peà a l’anime di David e Gjonate i volè ben tant che a se stes. 2 Saul lu fasè restâ alì e no lu lassà tornâ di so pari. 3 Gjonate al fasè un pat cun David, stant che i voleve ben come a se stes: 4 Gjonate si gjavà la manteline che al veve intorsi e je dè a David e ancje la munture di vuere, comprendude la spade, l’arc e il cinturon. 5 Ogni volte che al partive, pardut là che lu mandave Saul, David al vinceve e Saul lu metè in teste dai soldâts. Al jere cjalât di bon voli di dut il popul e ancje dai graduâts di Saul.
Gjelusie di Saul
6 Tal lôr tornâ indaûr, cuant che David al tornà dongje dopo di vê fat fûr il filisteu, lis feminis a jessirin di dutis lis citâts di Israel denant dal re Saul a cjantâ e a balâ cun tamburei, cun scriui di ligrie e cun sistris. 7 Lis feminis, balant, a cjantavin:
“Saul al à fat fûr i siei mil
e David i siei dismil!”.
8 Saul s’inrabià cence fin e la robe no i lè jù par mai. Al disè: “A David i àn dâts dismil e a mi dome mil. Al mancje dome che al deventi re!”. 9 E d’in chê dì, Saul al deventà gjelôs di David.
Atentât a la vite di David
10 Tal indoman, un spirt trist di Diu al plombà intor di Saul, che al lè fûr di sè propit in cjase sô. David al sunave la citare compagn di chei altris dîs e Saul al veve la lance in man. 11 Saul al bricà la sô lance e al berlà: “Cumò o sfracai David tal mûr!”, ma David al rivà a scjuvâlu doi viaçs. 12 Saul al vè pôre di David parcè che il Signôr al jere cun lui e al veve implantât Saul. 13 Alore Saul lu parà fûr e lu metè a cjâf di mil: al jessive e al jentrave in teste dal popul. 14 Ogni volte che al tacave, David al veve furtune e il Signôr al jere de sô bande. 15 Viodint che i levin dutis lis robis a bon fin, Saul al veve rivuart di lui, 16 ma ducj, in Israel e in Gjude, i volevin ben a David, che al partive e al tornave dongje simpri in teste dal popul.
Insidiis di Saul. Matrimoni di David
17 Saul i disè a David: “Ve mê fie Merab, la prime; te doi a ti. Baste dome che tu sedis fuart e che tu sepis batiti ben pes vueris dal Signôr”. Saul al pensave: “No pues fâlu fûr jo; al à di murî par mans dai filisteus”. 18 David i rispuindè a Saul: “Cui soio jo e ce riunde àio, ce ese la famee di gno pari in Israel, che o puedi deventâ ginar dal re?”. 19 Ma cuant che al rivà il moment di dâi a David la fie di Saul, Merab, je derin a Adriel di Mecole.
20 Tal fratimp, Mikal, fie di Saul, e pierdè il cjâf daprûf di David e jal contà a Saul, che al cjapà la robe in dolç. 21 Al pensà: “Jo je doi, ma e sarà par lui un tramai e la man dai filisteus lu fruçarà”. Saul i disè dôs voltis a David: “Vuê tu deventarâs gno ginar”. 22 Alore Saul ur dè ai siei fameis chest ordin: “Fevelait a David d’ascôs e disêtji: Il re ti à a grât e ancje i siei fameis ti vuelin ben; devente duncje ginar dal re”. 23 I fameis di Saul i ripeterin chestis peraulis tes orelis a David, ma David ur rispuindè: “Us semeial une cagnere deventâ ginar dal re? Jo o soi dome un puar om e o salti fûr di puare int”. 24 I fameis di Saul i contarin: “David al à dit cussì e cussì”. 25 Saul ur rispuindè: “O vês di dîi cussì a David: Il re nol vûl savêdint di paiaments di sorte pal maridaç, ma al vûl cent prepuzis di filisteus, parcè che al à di svindicâsi dai nemîs dal re”. Saul al smicjave invezit di fâ colâ David tes sgrifis dai filisteus. 26 I fameis di Saul i riferirin a David chestis peraulis e lui al cjatà che la robe e podeve lâ, tratantsi di deventâ ginar dal re. Nol jere nancje spirât il timp, 27 che David si preparà pe campagne, e al partì cui siei oms. Al copà dusinte filisteus e al puartà cjase i lôr prepuzis e jai contà al re su la muse par deventâ so ginar. Alore Saul i dè sô fie Mikal.
Struc de storie di Saul e di David
28 Saul al scugnì rindisi che il Signôr al jere cun David e che Mikal, fie di Saul, i voleve ben. 29 Alore Saul al vè ancjemò plui pôre di David e cuintri di lui i bulì dentri une asse par ducj i dîs de sô vite. 30 I sorestants dai filisteus a faserin une campagne daûr chê altre ma ogni volte che a tacavin, David al vinceve plui lui che no ducj i graduâts di Saul, e la int a vevin ducj ce dî di lui.