Miercus 3 Lui 2024
947 AGNS DE PATRIE

BIBIE IN LINIE

Salms

Introduzion

Torna alle bibie

Cjapitul 99

LIBRI I

Il sant di Israel, sentât in Sion, al è un Diu gjelôs e ch’al perdone (98)

99 1 Il Signôr al regne! Ch’a trimin ducj i popui.

Sui cherubins lui si sente: si scjasse la tiere.

2 Grant al è il Signôr in Sion,

adalt, sore ducj i popui.

3 Il to non grant e trement ch’a laudin,

parcè che sant al è lui.

4 Al regne cun valôr e i ten a la justizie.

Ce ch’al è just tu tu âs stabilît;

dome tu tu âs creât in Jacop il dirit e la justizie.

5 Laudait il Signôr nestri Diu,

denant dal scagn dai siei pîts ingenoglaitsi,

parcè che sant al è lui.

6 Mosè e Aron, framieç dai siei predis,

Samuel, framieç di chei che il to non a clamavin,

a clamavin il Signôr e lui ju scoltave.

7 Al fevelave cun lôr stant tune colone di nûi;

lôr a tignivin cont dai siei ordins

e de leç che ur veve dade in consegne.

8 Signôr, nestri Diu, tu tu ju scoltavis.

Tu jeris par lôr un Diu ch’al perdone,

cun dut che tu cjastiavis il mâl ch’a fasevin.

9 Laudait il Signôr nestri Diu,

denant de sô mont sante ingenoglaitsi,

parcè che al è sant il Signôr, nestri Diu.

Notis:

  • 99,2 - Seben che la paronance dal Signôr, de sô sente di Sion, e je sul popul ebraic, par dirit di nature e di creazion si slargje sun ducj i popui dal mont. Une idee semenade dai profetis che e à cjapât pît soredut dopo dal esili (seont la tradizion dal Deutero-Isaie).
  • 99,5 - L’arcje, e par conseguence ancje il templi, no puedin confinâ o delimitâ la presince di Diu, ch’al reste il “trassendent”. A puedin jessi dome un “scagn” là che lui al poe i pîts (viôt Is 66,2; Mt 5,35).
  • 99,6 - Mosè, famei di Diu e grant legjisladôr, e so fradi, il predi Aron, a son i antîcs intermediaris dal pat, che a vevin la funzion di intercedi ogni volte che il popul al straviave. Samuel, il grant judiç-profete di Silo (1 Sam 3,20), al à fat di mediatôr fra Diu e il popul cuant che e je stade metude sù la monarchie teocratiche di Saul e di David. Al è l’unic puest dal salteri che lu à indiment.
Cjapitui: