LIBRI I
Un biât al berle la sô pôre di murî (87)
88 1 Cjant. Salm. Dai fîs di Core. Al mestri dal coro. Sul aiar di “Macalot”. Pal cjant. Maskil. Di Eman l’ezrait.
2 Signôr, Diu de mê salvece,
o ài berlât dute la zornade,
e dute la mari gnot denant di te o stoi.
3 Ch’e rivi denant de tô muse la mê preiere;
slungje al gno lament la tô orele.
4 Parcè che la mê anime e je passude di disgraciis;
e su la puarte di chel altri mont e je rivade la mê vite.
5 Aromai mi àn metût cun chei ch’a van jù te buse,
mi cjati come un om che nol à vigorie.
6 E je là jù cui muarts la mê cjase,
come chei ch’a son stâts passâts fûr par fûr
e a polsin tai sepulcris:
di lôr tu nancje no tu ti visis,
lontans de tô man, a son cjonçâts vie.
7 Tu mi âs sistemât te buse sot tiere,
tal scûr e tal foran plui font.
8 Sore di me e à scravaçât la tô rabie,
tu mi âs fat colâ intor dutis lis tôs ondadis.
9 Tu âs slontanât di me ancje chei che mi cognossevin,
tu mi âs fat deventâ une robe ch’e fâs riviel par lôr.
O soi sierât tune preson cence sortide.
10 A sun di strussiâmi
ancje i miei vôi si consumin.
Ogni dì, Signôr, ti ài clamât,
lis mês mans viers di te lis ài slungjadis.
11 Di cuant in ca fastu pai muarts i tiei spetacui?
Varano di jevâ sù lis ombris a cjantâ la tô misericordie?
12 Si fevelaraial forsit dal to boncûr intal sepulcri?
O de tô fedeltât tal lûc là che dut si cidine?
13 Si contarano i tiei spiei intal scûr?
O te tiere dai dismenteâts la tô justizie?
14 Ma jo, Signôr, o clami il to jutori,
e dal cricâ dal dì che ti rivi la mê preiere.
15 Parcè mo, Signôr, âstu di butâ di bande la mê anime
e di platâ denant di me la tô muse?
16 O soi biât e cul pît su la buse di cuant che o jeri zovin;
o puarti il pês des tôs pôris che mi sfracain.
17 Parsore di me e je passade la tô rabie,
lis pôris che tu mi âs fatis a àn finît di copâmi;
18 dut il dì come aghe mi invulucin;
sore di me a plombin dutis intune.
19 Tu âs slontanât di me amîs e cognossincis,
dome il scûr mi fâs companie.