LIBRI I
Preiere di un servidôr dal Signôr ch’al patìs pe cause di Diu (68)
69 1 Al mestri dal coro. Sul aiar di “I gîs”. Di David.
2 Salvimi, Diu,
parcè che l’aghe fin tal cuel mi è rivade.
3 O soi dentri tun pantan cence fonde
e no cjati dulà grampâmi.
O soi plombât tun mulignel dal mâr
e la corint mi strissine vie.
4 O soi scanât a sun di berlis;
il gno cuel si suie
e i miei vôi si consumin
intant ch’o spieti il gno Diu.
5 And è un disordin, plui che no i cjavei dal gno cjâf,
chei che mi àn in asse cence merit.
A son masse potents i miei nemîs,
a son rude bausie chei che mi fasin cuintri.
Chei che no ur ài cjolt nuie,
ce varessio di tornâur?
6 Diu, la mê matetât tu le cognossis
e lis mês colpis no ti son platadis.
7 Che no restin deludûts pe mê colpe
chei che in te a sperin,
Signôr des schiriis;
che no vedin di deventâ ros pe mê colpe
chei che ti cirin, Diu di Israel.
8 Parcè che par colpe tô mi àn cjamât di ofesis
e la mê muse e je plene di vergogne.
9 O soi deventât un forest pai miei fradis,
un strani pai fîs di mê mari.
10 Parcè che la passion pe tô cjase mi à consumât
e lis ofesis di chei che ti svilanin mi son plombadis parsore.
11 A sun di zunâ mi soi scanât
e lôr instès mi disin dome robis.
12 O ài metût intor un sac par munture
e mi cjolin vie di un continui.
13 A tabain cuintri di me chei ch’a son sentâts su la puarte,
o soi deventât la cjante dai cjochelis.
14 Ma jo, Signôr, ti fâs la mê preiere;
ch’al puedi jessi chest, o Diu, un timp di gracie.
Tal to boncûr cence fin scoltimi,
Diu, che tu sês fedêl tal dâ salvece.
15 Dal pantan ven a gjavâmi;
che plui a font no ledi;
ch’o sedi deliberât di chei che mi àn in asse
e dal gorc des aghis fondis.
16 Che no mi meni vie la corint des aghis;
che il pantan no mi supi dentri
e l’abìs che nol spalanchi la sô bocje par glotimi.
17 Scoltimi, Signôr, parcè che la tô misericordie e je tant dolce;
tal to boncûr cence misure dàmi une des tôs cjaladis.
18 No sta platâi la tô muse al to famei,
parcè che la disperazion mi gafe;
spessee a dâmi une rispueste!
19 Anìn dongje de mê vite e sfrancjile,
deliberimi di chei che mi àn in asse.
20 Tu cognossis la mê tristerie,
il gno disonôr e la mê vergogne;
tu âs denant dai vôi ducj i miei nemîs.
21 La vergogne e à crevât il gno cûr
e mi sint a lâ al mancul.
Tun sclip di compassion, ma dibant, o ài sperât;
o ài spietât che cualchidun mi confuartàs,
ma no lu ài cjatât.
22 Invezit mi àn dade fêl par mangjative
e mi àn esibît asêt par bevande.
23 Che la lôr taule e deventi denant di lôr une palisse
e i lôr gustâs une vuate.
24 I lôr vôi che si scurissin fin che no viodin altri,
e distudiur par simpri la vigorie dai lôr ombui.
25 Sbroche cuintri di lôr la tô fumate,
che ju brinchi la sflameade de tô rabie.
26 In desert si tramudi il lôr campament,
che no si cjati un di numar
ch’al ledi a stâ tes lôr tendis.
27 Parcè che i àn fat cuintri
a di chel che tu lu vevis za pestât,
a àn reonzût il dolôr di chei che tu vevis za ferîts.
28 Reonç colpe a la lôr colpe,
di mût che il cont no rivin mai a saldâti.
29 Ch’a sedin parâts jù dal libri dai vîfs
e che insieme cui juscj no vegnin mai segnâts.
30 Cumò, Diu, o soi puar e malât:
la tô salvece mi ristorarà, o Diu.
31 O vuei laudâ cul cjant il non di Diu
e cui ringraciaments puartâlu.
32 Chest il Signôr lu varà a grât
plui che no un manzut,
plui che no un torel cun tant di cuars e di ongulis.
33 Cjalait, puare int, e indalegraisi,
e vualtris ch’o cirîs Idiu,
che il vuestri cûr al cjapi fuarce.
34 Parcè che la puare int il Signôr al scolte
e i siei presonîrs nol bute di bande.
35 Che lu laudin i cîi e la tiere,
i mârs e dut ce ch’al nade dentri.
36 Diu al salvarà Sion
e al fasarà sù lis citâts di Gjude;
li a laran a stâ e a varan paronance.
37 La gjernazie dai siei fameis
lis varà in ereditât
e chei che il so non a presein
a podaran sistemâsi li par simpri.