LIBRI I
Il nocent liberât dal complot de int triste (63)
64 1 Al mestri dal coro. Salm. Di David.
2 Scolte la mê vôs, o Diu,
cuant che fin li di te il gno lament o alci;
de pôre dal nemì sparagne la mê vite;
3 vuardimi de semblee de int triste,
dal davuei di chei che il mâl a fasin.
4 Parcè che a ucin la lôr lenghe tant che une spade,
a train peraulis garbis tant che frecis,
5 par colpî il nocent di sot vie;
lu colpissin a tradiment, cence nissune pôre.
6 Cu la lôr inicuitât a àn cjapât coragjo;
tal platâ i lôr trucs si metin d’acuardi
disint: “Cui mai ju viodial?”.
7 A fasin progjets un piês di chel altri,
a àn prontât un disen studiât fin tal ultin:
l’om al è une sfondare infinide
e il so cûr un abìs font.
8 Ma Diu al à trat cuintri di lôr lis sôs frecis:
a colp si à viodût lis lôr feridis.
9 Ju à fats colâ cu lis lôr stessis lenghis
e ducj a menin il cjâf viodintju.
10 Plens di spavent, ducj i umign
a àn contadis lis oparis di Diu,
a àn ricognossudis lis sôs voris.
11 Il just che s’indalegri tal Signôr
e ch’al speri in lui;
ducj chei ch’a àn il cûr mont in bon si tegnin.