LIBRI I
Brame passionade di Diu e gjonde pal don de sô gracie (62)
63 1 Salm. Di David. Cuant ch’al jere tal desert di Gjude.
2 Diu, Diu gno, sul crichedì o soi pront a cirîti;
e à arsetât di te la mê anime;
viers di te la mê cjar e brame
come une tiere sute,
arsinide, cence aghe.
3 Cussì mi soi metût a cjalâti tal to santuari
par viodi la tô potence e la tô glorie.
4 Parcè che la tô gracie e vâl plui che no la vite,
a cjantaran i miei lavris lis tôs laudis.
5 Cussì ti benedissarai par dute la vite,
lis mans viers dal to non o slungjarai.
6 La mê vite si passarà come te miôr taulade,
biel che la mê bocje ti laudarà cjantant di ligrie.
7 Cuant ch’o soi sul gno stramaç, ti pensi,
cuant ch’o vegli gnot vie di te mi visi.
8 Tu sês stât tu il gno jutori,
jo mi jempli di gjonde sot des tôs alis.
9 Tor di te si strenç la mê anime,
la fuarce de tô gjestre mi sostente.
10 Ma chei che cence un parcè a van cirint la mê vite,
a laran a finîle tes sfondaris de tiere;
11 a vignaran consegnâts a la spade
e a finissaran sgnangassâts dai siacai.
12 Il re invezit al gjoldarà in Diu
e si tignaran in bon ducj chei ch’a zurin sun lui,
parcè che la bocje dai bausârs e sarà stropade.