LIBRI I
La false sigurece dal siôr e la sperance dal puar fondade in Diu (48)
49 1 Al mestri dal coro. Dai fîs di Core. Salm.
2 Scoltait chest, o popui de tiere,
vualtris ch’o sês a stâ in chest mont, sintîmi,
3 i grancj a pâr dai piçui,
vualtris siôrs e ancje vualtris biâts.
4 La mê bocje e fevelarà di robis sapientis,
al butarà fûr robis di sintiment il gno cûr.
5 O slungjarai la mê orele a la peraule de sapience,
il gno sproc profont lu disvuluçarai cu l’arpe.
6 Parcè varessio di vê pôre dai dîs de disgracie,
cuant che la tristerie di chei che mi corin daûr
dulintor mi brinche?
7 Lôr a stan fidâts inte lôr robe
e tes lôr grandis ricjecis si vantin.
8 Sigûr che nissun nol podarà salvâsi,
nissun nol podarà dâi il presit dal so riscat a Diu.
9 Al coste masse il riscat de sô vite
e nol rivarà par mai
10 a podê vivi par simpri
cence lâ jù te buse.
11 Parcè che ve: i sapients a muerin
e s’int van te stesse maniere
tant il trist che il stupit,
lassant a di chei altris dute la lôr robe;
12 lis tombis a saran lis lôr cjasis eternis,
il lûc là ch’a varan di stâ di ete in ete,
lôr ch’a vevin metût il lôr non su tantis tieris!
13 Epûr l’om ch’al è in alt nol rive a sancirâsi
di jessi precîs des bestiis ch’a vegnin copadis.
14 Chest al è il distin di chei
ch’a poin su di sè la lôr fiducie;
cheste e je la fin di chei
che si tegnin in bon de lôr cjacare.
15 A son distinâts tes inferis tant che un trop di pioris,
la muart e sarà il lôr pastôr;
a laran jù cence remission intal sepulcri
e la lôr glorie e je distinade a lâ in nuie,
parcè che a saran lis inferis la lôr cjase.
16 Diu però al salve la mê anime
de gafe des inferis al savarà brincâmi.
17 No sta bacilâ se un al devente siôr,
s’al cres il lusso de sô cjase,
18 parcè che cuant ch’al mûr
nuie daûr no si puarte,
il so lusso nol larà jù cun lui.
19 Se ancje inte sô vite se gjolt cu la sô anime:
“Ducj a àn ce laudâti parcè che tu âs une grande furtune”,
20 al larà instès a compagnâsi
cu la gjernazie dai siei paris,
che no viodaran la lûs par in secula.
21 Epûr l’om ch’al è in alt nol rive a sancirâsi
di jessi precîs des bestiis ch’a vegnin copadis.