LIBRI I
Te cjase dal Signôr sflandôr e bondance; pal trist dome miserie e impotence (35)
36 1 Al mestri dal coro. Dal famei dal Signôr. Di David.
2 Il pecjât i cisiche al trist intal so cûr,
no ’nd è timôr di Diu denant dai siei vôi.
3 Parcè che lui dibessôl si imbroe
tal cirî il so cjastic e la sô colpe.
4 Tristerie e imbroi a son lis peraulis de sô bocje,
cun sintiment al à finît di compuartâsi
e il ben nol fâs altri.
5 Intal jet al studie tristeriis,
al reste salt su la strade no juste,
il mâl nol vûl savênt di butâ di bande.
6 Signôr, il to boncûr al va sù fin tai cîi,
fin parsore dai nûi la tô fedeltât.
7 La tô justizie e je tant che lis monts plui altis,
il to judizi tant che l’abìs plui font.
Oms e nemâi, Signôr, tu tu salvis.
8 Cetant ch’al vâl il to boncûr, o Diu,
ta l’ombre des tôs alis i fîs dal om a van a parâsi.
9 Lôr si saciin de bondance de tô cjase,
al riul dai tiei plasês tu ju ristoris.
10 Parcè che in te e je la risultive de vite;
inte tô lûs nô la lûs o rivarìn a viodi.
11 Mostriur simpri il to boncûr
a di chei che ti rispietin,
a di chei che a àn un cûr sclet la tô justizie.
12 No sta lassâ che mi cjapi il pît dai supierbis,
che no mi fasi scjampâ vie la man de int triste.
13 Ve che i triscj a son colâts,
si son inçopedâts e no rivin a jevâ sù altri.