LIBRI I
Supliche plene di fidance dal just incolpât cence merit (26)
27 1 Di David.
Il Signôr al è la mê lûs e la mê salvece,
di cui varaio teme?
Il Signôr al è chel ch’al pare la mê vite,
di cui varaio pôre?
2 Se i triscj intor mi petin
la mê cjar a sbrindinin,
ve che s’inçopedin e a colin,
i miei nemîs e i miei contraris.
3 Se un esercit intîr cuintri di me si campe,
il gno cûr nol à pôre;
se si discjadene cuintri di me la batae,
propit in chel moment o varai plui fede.
4 Une robe i domandi al Signôr
e dome cheste o brami:
di stâ te cjase dal Signôr
ducj i dîs de mê vite,
par gjoldi de bontât dal Signôr
e veglâ sul crichedì tal so templi.
5 Parcè che lui mi vuardarà intal so ripâr,
te dì de disgracie mi platarà dentri de sô tende,
mi sistemarà adalt, su la crete.
6 Par chel cumò il gno cjâf al pò alçâsi
parsore dai miei nemîs,
che torator di ogni bande mi balinin,
e o pues ufrîi inte sô tende sacrificis di ligrie.
Alore i cjantarai al Signôr dute la mê gjonde.
7 Scolte, Signôr, la vôs dal gno berli,
ve dûl di me e rispuindimi.
8 Il gno cûr a ti ti fevele, ti cîr te la mê muse;
la tô muse, Signôr, o voi cirintle.
9 No sta platâmi alore la tô muse,
no sta parâ vie disdegnât il to famei,
tu che tu mi paris.
No sta parâmi vie, no sta bandonâmi, Diu de mê salvece.
10 Ve, mi àn bandonât gno pari e mê mari,
invezit il Signôr mi à vierzude la puarte.
11 Mostrimi, Signôr, la tô strade,
menimi pal troi di justizie,
par vie di chei che mi dan la gafe.
12 No sta lassâmi tes sgrifis dai miei nemîs,
parcè che mi fasin cuintri testemonis fals
e int ch’e travane tristerie.
13 Ce saressial stât di me se no fos stât sigûr
di gjoldi de bontât dal Signôr te tiere dai vîfs?
14 Spere tal Signôr! Dàti coragjo,
ch’al cjapi fuarce il to cûr, e spere tal Signôr.