LIBRI I
Ringraciament pal boncûr cence fin dal Signôr (117)
118 1 Laudait il Signôr, parcè che al è bon,
parcè che il so boncûr al è par simpri.
2 Che lu disi Israel:
Il so boncûr al è par simpri.
3 Che lu disi la cjase di Aron:
Il so boncûr al è par simpri.
4 Che lu disin chei ch’a rispietin il Signôr:
Il so boncûr al è par simpri.
5 Te disperazion o ài clamât il Signôr;
il Signôr mi à rispuindût e mi à tirât fûr dal pericul.
6 Il Signôr al è de mê bande: no varai pôre di sorte;
un om ce puedial mai fâmi?
7 Il Signôr al è par me il gno jutori:
o podarai sfidâ chei che mi àn in asse.
8 Al è ben lâ a parâsi tal Signôr,
miei che no stâ fidâts sui umign.
9 Al è ben lâ a parâsi tal Signôr,
miei che no stâ fidâts su lis potencis.
10 Ducj i forescj mi vevin cerclât,
ma tal non dal Signôr ju ài fruçâts.
11 Mi vevin cerclât, mi vevin contornât,
ma tal non dal Signôr ju ài fruçâts.
12 Mi vevin cerclât tant che lis âs,
come il fûc tai baraçs a vevin cjapade fuarce,
ma tal non dal Signôr ju ài fruçâts.
13 Mi àn dât une grande pocade par che o colàs par tiere;
ma il Signôr al è vignût in gno jutori.
14 Mê fuarce e gno cjant al è il Signôr,
al è lui che mi à salvât.
15 Scriui di gjonde e di vitorie
tes tendis de int juste!
16 La gjestre dal Signôr e à fatis robononis;
la gjestre dal Signôr si è alçade,
la gjestre dal Signôr e à fat spetacui.
17 No murarai gran; o restarai in vite
par podê contâ i sflandôrs dal Signôr.
18 Il Signôr mi à cjastiât fint avonde,
però tes mans de muart no mi à metût.
19 Spalancaitmi lis puartis de justizie:
o vuei jentrâ a ringraciâ il Signôr.
20 Cheste e je la puarte de justizie:
par chi dome i juscj a jentrin.
21 Ti ài a grât parcè che tu mi âs scoltât,
e tu sês stât la mê salvece.
22 La piere che i muradôrs le vevin butade di bande
e je deventade il cjantonâl.
23 A fâ dut chest al è stât il Signôr;
e je une robonone pai nestris vôi.
24 Cheste e je la zornade che le à fate il Signôr:
gjoldìn e fasìn fieste.
25 Dànus, Signôr, la salvece;
dànus, Signôr, la vitorie!
26 Benedet chel ch’al ven tal non dal Signôr;
us benedìn de cjase dal Signôr.
27 Diu al è il Signôr e nus à jemplâts di lûs.
Inviait la prucission cu lis ramis frundinosis
fin di ca e di là dal altâr.
28 Tu tu sês il gno Diu e ti ài a grât;
tu sês tu il gno Diu e jo ti laudi.
29 Laudait il Signôr, parcè che al è bon:
parcè che il so boncûr al è par simpri.