LIBRI I
L’Esodo, manifestazion sflandorose dal Diu di Israel (113a)
114 1 Cuant che Israel dal Egjit al è jessût,
la famee di Jacop di une int foreste,
2 Gjude al è deventât il so santuari,
Israel la tiere de sô paronance.
3 Il mâr al è scjampât viodintlu,
il Gjordan al à cessât indaûr;
4 tant che rocs lis monts a saltuçavin,
tant che agnei dal trop lis culinis.
5 Ce âstu po, mâr, che tu scjampis,
e tu, Gjordan, che tu siruchis?
6 Parcè po vualtris, monts, tant che rocs saltuçaiso,
e tant che agnei dal trop, vualtris culinis?
7 Presince dal Signôr di dute la tiere,
presince dal Diu di Jacop:
8 lui al tramude tun sfuei la crete,
e il clap tune risultive di aghe.