LIBRI I
Fedeltât dal Signôr a lis promessis fatis ai paris (104)
105 1 Laudait il Signôr, al so non clamait jutori,
contait framieç dai popui lis sôs robonis.
2 Cjantait in so onôr, laudaitlu,
pensait a font sun ducj i siei spetacui.
3 Dal so sant non gloriaitsi;
che il cûr s’indalegri di ducj chei ch’a van cirint il Signôr.
4 Cirît il Signôr e la sô potence;
cirît di un continui la sô muse.
5 Dai spetacui ch’al à fat impensaitsi,
dai siei meracui e dai judizis de sô bocje:
6 vualtris, gjernazie di Abram, so famei,
fîs di Jacop, sô preference.
7 Lui al è il Signôr, nestri Diu;
sun dute la tiere a valin i siei judizis.
8 Lui si ricuarde dal so pat par simpri,
– de peraule ch’al à dade par mil etis –
9 ch’al à fat cun Abram,
dal zurament che i à dât a Isac.
10 Jal à confermât a Jacop tant che un so ordin
e a Israel tant che une aleance eterne,
11 cuant che al à dite:
“A ti ti darai la tiere di Canaan,
come purizion di ereditât che us tocje”.
12 Cuant che lôr a jerin un troput piçul,
pôcs e forescj inta chê tiere,
13 torseons di un popul a chel altri,
di un ream a di un altri popul,
14 no i à permetût a nissun di tibiâju
e al à cjastiât ancje i rês par lôr colpe:
15 “No stait a tocjâ la mê int consacrade;
no stait a fâur dal mâl ai miei profetis!”.
16 Al à fate vignî la miserie su la tiere,
ogni sostentament di pan ur à cjonçât.
17 Al à mandât un om denant di lôr:
in cont di sclâf Josef al fo dât vie.
18 A àn strenzût i siei pîts cu lis cjadenis,
il so cuel pal fier al è passât;
19 fin che no si è colmade la sô sentence,
e no i à dade reson la peraule dal Signôr.
20 Alore il re al à mandât a dispeâlu,
il grant paron dai popui al à mandât a liberâlu.
21 Lu à alçât fint a sorestant de sô cjase,
sorintendent di dute la sô robe,
22 par che ur splanàs il so volê ai princips,
e ur insegnàs ai siei anzians la sapience.
23 In chê volte Israel in Egjit al è jentrât,
Jacop te tiere di Cam al à stralozât.
24 Ma Diu al à moltiplicât il so popul,
plui dai siei nemîs lu à fat cressi.
25 Al à mudât il lôr cûr
par ch’a vessin in asse il so popul,
par che cuintri dai siei fameis a tiessessin imbrois.
26 Al à mandât Mosè so servidôr,
Aron che lui s’al veve sielzût.
27 Al à metût in lôr lis sôs grandis peraulis,
e te tiere di Cam i siei meracui.
28 Al à mandade la gnot e si à fat scûr,
ma no àn volût pleâsi a lis sôs peraulis.
29 Al à gambiadis in sanc lis lôr aghis
al à fat che i lôr pes a murissin.
30 Dute la lôr tiere di crots e sbulignave,
dai lôr rês fintremai tes cjamaris.
31 Al à dât un ordin e a son plombadis lis moscjis,
e i moscjits par ogni dontri.
32 Impen de ploe ur à mandade la tampieste,
fûcs e saetis te lôr tiere.
33 Daspò al à fiscât fiârs e vignâi,
de lôr regjon al à slidrisâts i arbui.
34 Al à dât un ordin e i zupets si son dâts dongje,
e viers di no rivâ a contâju;
35 a àn diluviade te lôr tiere ogni sorte di jerbe;
a àn netade ogni sorte di pome inte regjon di ogni bande.
36 Podopo al à pestât i prins nassûts
in dute la lôr tiere, dutis lis primiziis de lôr vigorie.
37 Alore ju à fats saltâ fûr cjamâts di arint e di aur,
e tes lôr tribûs no ’nd jere nancje un malât.
38 L’Egjit al à tirât il flât par vie ch’a levin,
parcè che framieç di lôr terôr al regnave.
39 Al à slargjât un nûl par taponâju,
e un fûc par inluminâju gnot vie.
40 Cuant che i àn domandât, ur à fat rivâ lis cuais
e cuntun pan dal cîl ju à passûts.
41 Al à vierzût il cret e e je spissulade l’aghe,
intal desert tant che un flum e coreve.
42 Parcè che si impensà de sô peraule sante,
che je veve dade a Abram so servidôr.
43 Alore al à fat vignî fûr il so popul dut in gjonde,
i siei sielzûts framieç des scriuladis.
44 E ur à dadis a lôr lis tieris de int paiane,
a àn vudis di legjitime lis ricjecis dai popui,
45 par ch’a metessin in vore i siei ordins
e a lis sôs leçs a ubidissin.
Aleluia.