LIBRI I
La stabilitât di Diu sperance par ogni avilît e pal popul umiliât (101)
102 1 Preiere di un biât ch’al gem e si sbroche lamentantsi cul Signôr.
2 Signôr, scolte la mê preiere;
ch’al rivi fin li di te il gno berli.
3 No sta tignîmi platade la tô muse,
cuant che la disperazion mi gafe.
Slungje viers di me la tô orele;
no sta intardâti a rispuindimi cuant che ti clami.
4 Parcè che si sfantin tant che fumate lis mês zornadis;
tant che boris i miei vues si arsinissin.
5 Al è stât urtât il gno cûr,
si è secjât tant che la jerbe;
o lassi parfin di cjoli la bocjade.
6 A sun di gemi,
tor dai vues la mê piel si è tacade.
7 O soi deventât tant che un pelican dal desert,
precîs di un çus framieç des maseriis.
8 Tal veglâ cence padin
o soi deventât tant che une passare
ch’e sta sul cuviert bessole nampie.
9 Mi disin di dut ogni dì i miei nemîs,
a àn par me un’asse invelegnade;
cuintri dal gno non a bramin.
10 Impen dal pan mi pas di cinise,
lis mês lagrimis al bevi si messedin.
11 Parcè che tu sês cuintri di me disdegnât e rabiôs,
tu mi âs gafât e lontan tu mi âs sgurlât.
12 I miei dîs a son tant che une ombrene che si slungje,
biel che mi sint a suiâ come la jerbe.
13 Ma tu, Signôr, tu âs une sente eterne;
il to ricuart al passe di une ete in chê altre.
14 Tu jevarâs sù e tu varâs dûl di Sion,
parcè che il moment di vê dûl di jê al è rivât,
aromai e je ore passade.
15 I tiei fameis a àn il lôr cûr tacât a lis sôs pieris;
a sintin passion par chês maseriis.
16 I forescj a varan teme dal non dal Signôr;
de tô glorie ducj i rês de tiere.
17 Parcè che il Signôr al à tornât a fâ sù Sion
e si è pandût in dute la sô glorie.
18 Al à scoltade la preiere dai bandonâts,
la lôr supliche nol à sbeleade.
19 Chest ch’al vegni segnât pe ete ch’e vignarà dopo,
e che une int gnove i dedi laut al Signôr.
20 Il Signôr al à cjalât dal alt dal so santuari,
dal cîl al à cjalade jù la tiere,
21 par sintî il jesolâ dal presonîr,
par liberâ i condanâts a muart,
22 e cussì ch’a contin il non dal Signôr in Sion,
e la sô laut in Gjerusalem,
23 cuant che ducj i popui si daran dongje insieme
e ducj i reams par servî il Signôr.
24 E je stade cjonçade par strade la mê vigorie;
a son stadis scurtadis lis mês zornadis.
25 Jo o dîs: Gno Diu,
no sta puartâmi vie a mieç des mês zornadis.
I tiei agns a tirin vie di une ete in chê altre.
26 Sul imprin tu âs butadis lis fondis de tiere
e vore des tôs mans a son stâts i cîi.
27 Lôr a sparissaran, ma tu tu restis;
ducj lôr si fruiaran tant che une vieste,
tu ju mudarâs tant che une munture
e lôr a saran mudâts.
28 Ma tu invezit simpri chel tu restis
e i tiei agns no finissaran par mai.
29 I fîs dai tiei fameis a varan une cjase
e sarà salde denant di te la lôr gjernazie.