Preambul
Rapuarts dai cristians cu lis autoritâts civîls
13 1 Ogni persone e à di stâ sotometude a lis autoritâts plui altis di jê. Di fat no esist autoritât che no vegni di Diu; e lis autoritâts ch’o vin a son stadis stabilidis e comandadis di Diu. 2 Di mût che chel che si rivolte cuintri de autoritât, si met cuintri di un ordin stabilît di Diu. Chei po che si metin cuintri, si tirin propit intor la condane cu lis lôr mans. 3 Di fat i sorestants no fasin pôre a di chel ch’al fâs il ben ma a di chel ch’al fâs il mâl. Vuelistu alore no vê pôre de autoritât? Fâs il ben e tu varâs la sô laude. 4 Di fat e je a servizi di Diu par te, par che tu fasis il ben. Ma se tu fasis il mâl, alore tu scuegnis vê pôre: parcè che no à la spade in man dibant. Di fat e je a servizi di Diu, come imprest de rabie di Diu tai confronts di chel che al fâs il mâl. 5 Par dutis chestis resons, si à di stâ sotometûts, no dome par pôre dal cjastic ma par cuistion di cussience. 6 Par chel o vês ancje di paiâ lis tassis: parcè che chei che a fasin chest mistîr a son servidôrs publics di Diu. 7 Dait a ducj ce ch’a àn dirit di vê: la tasse a di chel ch’al à dirit a la tasse, il rispiet a di chel ch’al à dirit al rispiet, l’onôr a di chel ch’al à dirit al onôr.
L’amôr plenece di ducj i comandaments
8 Viers di ognidun o vês di vê dome chest debit: di volêsi ben un cul altri. Di fat chel che i vûl ben a di chel altri al à colmade la leç. 9 Di fat: No sta fâ adulteri, no sta copâ, no sta robâ, no sta desiderâ e ducj chei altris comandaments a son strucâts e colmâts in chestis peraulis: Tu amarâs il to prossim come te in persone . 10 Di fat l’amôr nol fâs mai mâl al prossim; par chel l’amôr al è la colme de leç.
Il spietâ cristian
11 O vês di fâ cussì cussients dal moment di salvece che o stin vivint: al è za rivât par vualtris il timp di dismovisi de sium; di fat cumò la nestre salvece e je plui dongje di cuant che o vin dit di sì a la fede. 12 La gnot e je indenant, il dì al è daûr a cricâ. Alore butìn di bande lis oparis dal scûr e vistinsi des armis de lûs. 13 Compuartìnsi cu la dignitât ch’al à di vê chel che al opere in plen dì: no cun baldoriis e cun cjochis, no cun sporcjetâts e cun robatis, no cun barufis e cun gjelosiis. 14 Vistîtsi invezit dal Signôr Gjesù Crist e no stait a lâ daûr de cjar cu lis sôs bramis disordenadis.