Preambul
Israel nol è rivât a la justificazion di Crist
10 1 Fradis, la brame dal gno cûr e la mê preiere a Diu par lôr a son par che si salvin. 2 Di fat o ricognòs che a àn passion par Diu, ma no seont une cussience juste. 3 Di fat cul no volê ricognossi la justizie di Diu e cul cirî di tignî dûr inte lôr, no si son sotometûts a la justizie di Diu.
Justificazion e salvece
4 Il fin ultin de leç al è Crist, par puartâur cussì la justificazion a ducj chei ch’a crodin.
5 Di fat Mosè al scrîf a rivuart de justizie ch’e ven de leç: L’om che le met in vore al vivarà midiant di jê . 6 Invezit la justizie ch’e ven de fede e dîs cussì: No sta dî intal to cûr: Cui laraial sù in cîl ? Chest al vûl dî fâ vignî jù Crist; 7 o ben: Cui laraial jù tal abìs ? Chest al vûl dî fâ vignî sù Crist dai muarts. 8 Ma ce disie? La peraule e je dongje di te, su la tô bocje e tal to cûr . E cheste e je la peraule de fede che nô o proclamìn: 9 se tu professis cu la tô bocje Gjesù come Signôr, e tu crodis intal to cûr che Diu lu à resussitât dai muarts, tu sarâs salvât. 10 Di fat si crôt cul cûr par vê la justificazion e cu la bocje si fâs profession par vê la salvece. 11 Di fat e dîs la Scriture: Chel ch’al crôt in lui nol restarà malapaiât . 12 Di fat no ’nd è plui diference tra gjudeus e grêcs: parcè che lui al è il Signôr di ducj, e al dà fûr lis sôs ricjecis sun ducj chei che lu prein. 13 Di fat ducj chei ch’a prein il non dal Signôr a saran salvâts. 14 Ma cemût varessino podût preâ un che no àn crodût in lui? E cemût varessino podût crodi intun che no àn mai sintût? E cemût varessino podût sintî se un no lu predicje? 15 E cemût varessino podût predicjâ se no fossin stâts mandâts? Come ch’al è scrit: Ce biei ch’a son i pîts di chei che a puartin une buine gnove !
16 Ma no ducj a àn ubidît, lant daûr de buine gnove. Di fat Isaie al dîs: Signôr, cui àial crodût a ce che i vin contât ? 17 La fede e dipent duncje de predicazion e la predicazion si colme midiant des peraulis di Crist. 18 Ma jo o dîs: Salacor no àno sintût? Anzit:
Par dute la tiere la lôr vôs si è slargjade,
fint ai confins dal mont a son rivadis lis lôr peraulis.
19 O dîs ancje cheste: Salacor Israel nol àial capît? Lu dîs par prin Mosè:
Us fasarai deventâ gjelôs di un popul che nol è popul:
us stiçarai cuintri di une gjernazie cence sintiment.
20 Isaie al rive adiriture a dî:
Mi àn cjatât chei che no mi cirivin,
mi soi palesât a di chei che no domandavin di me.
21 A Israel invezit i dîs: Dut il dì o ài slungjadis lis mans viers di un popul disubidient e cjaviestri!