la SAPIENCE e i siei conseis
Preambul
22 1 Un bon non al vâl plui che no une grande ricjece
e la reputazion plui che no l’arint e l’aur.
2 Il siôr e il puar si incuìntrin insieme:
al è il Signôr che ju à fats duc’ i doi.
3 L’om di sintiment al viôt la disgracie e al va a parâsi;
i basoâi a pàssin par dongje e a plòmbin dentri.
4 L’umiltât e bute il timôr dal Signôr,
la ricjece, l’onôr e la vite.
5 Spinis e laçs su la strade dal trist;
chel ch’al à cure di sè si ten lontan.
6 Insegnij a di un zovin la strade ch’al à di bati;
ancje di vieli no si slontanarà.
7 Il siôr al parone sui puars
e chel ch’al à di dâ al è sclâf di chel ch’al à di vê.
8 Chel ch’al semene tristerie al cjape sù disgracie
e la vuiscje de sô rabie j pete jù a lui.
9 Il voli ch’al à dûl al sarà benedît,
parcè che j à dât al puar un toc dal so pan.
10 Pare vie il mincjonadôr e la sconcuardie s’in’ larà
e a cessaran barufe e ofese.
11 Chel che j ten a la mondisie dal cûr
e ch’al à buine gracie sui lavris, il re al è so amî.
12 I vôi dal Signôr a vuàrdin il savê,
ma lui al fruce lis peraulis dal bausâr.
13 Al dîs il poltron: “Al è un leon li di fûr!
O sarai parât a tocs tal mieç de strade!”.
14 La bocje de femine foreste e je une busate fonde;
chel che il Signôr al condane al plombarà dentri.
15 La matetât e je peade al cûr dal zovin:
la vuiscje dal cjastic lu ten lontan di jê.
16 Chel ch’al tibìe il puar lu fâs deventâ siôr;
chel che j dà al siôr al devente dome plui puar.
PERAULIS DAI SAVIS
17 Slungje l’orele e scolte i miei discors,
met dut il to cûr par rivâ a capîju.
18 A son gjoldibij se tu ju tegnis tal to pet,
s’a restaran insieme sui tiei lavris.
19 Par che il Signôr al sedi la tô fiducie,
o vuei istruiti vuè in merit a la tô strade.
20 No àjo scritis par te trente peraulis,
fra conseis e insegnaments,
21 par che tu puedis fâ cognossi la veretât,
rispuindiur a di chei che ti interpèlin?
22 No sta spelâ il puar, parcè che al è puar,
e no sta tibiâ su la puarte il disgraciât,
23 parcè che il Signôr al difindarà la lôr cause
e ur robarà la vite a di chei che ur àn robât.
24 No sta deventâ amî di un scjaldinôs
e no sta frecuentâ chel che s’inrabie,
25 par no imparâ a fâ compagn di lui
e dopo cjatâti un laç te tô vite.
26 No sta jessi di chei ch’a ufrissin la gjestre,
ch’a garantissin pai debits di chei altris:
27 se no tu às cun ce pajâ,
ti puartaran vie ancje il jet sot di te.
28 No sta spostâ il confin vieri
che lu àn metût i tiei vons.
29 Viodistu un om svelt in te sô vore?
Al varà une place denant dai res.
Nol restarà plui denant di int cualunche.