la SAPIENCE e i siei conseis
Preambul
16 1 I progjets dal cûr a son dal om,
ma la rispueste de lenghe e ven dal Signôr.
2 Dutis lis stradis dal om lui lis viôt mondis,
ma chel ch’al scrutine i spirts al è Il Signôr.
3 Met tes mans dal Signôr lis tôs voris
e i tiei progjets a laran in puart.
4 Ogni vore dal Signôr e je fate par un fin;
ancje il trist, pe dì dal svindic.
5 Il Signôr nol pò nulî un cûr supierbeôs;
di sigûr nol restarà cence condane.
6 Cul boncûr e cu la fedeltât si pare jù il pecjât
e cul timôr dal Signôr si sta vuardâts dal mâl.
7 Cuanche il Signôr al è content des stradis di un om,
j fâs tornâ in buinis ancje i siei nemîs.
8 Al è miei vê pôc ma cun justissie
che no tante robe cence l’onestât.
9 Il cûr dal om al distine la sô strade,
però il Signôr al rinfuartis il so pas.
10 Sui lavris dal re e je la peraule di Diu,
cuanche al fâs sentence, la sô bocje no sgare.
11 La staderie e i plats jusc’ a son dal Signôr,
duc’ i pês dal sac ju à fats lui.
12 I res no sapuàrtin che si fasi il mâl,
parcè che la sente si rinfuartis cu la justissie.
13 I res si consòlin cui lavris jusc’,
lôr j vuelin ben a di chel ch’al dîs robis justis.
14 La rabie dal re e je un mes di muart,
ma l’om savi al rive a bonâle.
15 Te lûs de muse dal re e je la vite,
e la sô gracie e je tanche un nûl di ploe in te vierte.
16 Vê sapience al vâl plui che no vê aur
e vê inteligjence al vâl plui che no vê arint.
17 Il troi dai jusc’ al è sfuî il mâl;
chel ch’al ûl tignî cont de sô anime al ten di voli la sô strade.
18 Denant de ruvine e je la supierbie,
denant de colade al è un spirt alterât.
19 Miei fâsi piçui cui puars
che no spartî il rafât cui prepotençs.
20 Chel ch’al sta atent a la peraule al cjate ben,
e chel ch’al sta fidât in tal Signôr al è furtunât.
21 Chel ch’al è savi di cûr j dìsin ch’al à cjâf
e un fevelâ dolç al fâs preseâ di plui.
22 Par chel che le à, la sapience e je risultive di vite
ma il cjastic dai stupits e je la stupiditât.
23 Il cûr dal savi j dà sintiment a la sô bocje
e i siei lavris a cuìstin in rivuart.
24 Un boç di mîl a son lis peraulis buinis,
dolcis pa l’anime e a fàsin ben ai vues.
25 Ai vôi dal om une strade e semee drete,
epûr tal ultim a son i trois de muart.
26 Il stomi dal lavorent al lavore par lui,
parcè che sun lui si fâs fuarte la sô bocje.
27 L’om trist al prepare il mâl
e sui siei lavris al à come un fûc imborât.
28 L’om inturtiçât al fâs nassi la sconcuardie
e chel ch’al slengone al divît i amîs.
29 L’om violent al tire de sô bande il prossim
e lu mene par une strade no juste.
30 Chel ch’al cimie al masane falsetâts,
chel che si muart i lavris al fâs il mâl.
31 Corone di glorie a son i cjavei blancs;
si cjatile sul troi de onestât.
32 Miei un om ch’al stente a inrabiâsi che no un om di valôr,
e chel ch’al ten sot il so spirt al vâl plui di chel ch’al cjape une sitât.
33 Tal grim dal vistît si tire a bruscjete,
ma chel ch’al distine al è dome il Signôr.