ORDINS DAL SIGNÔR TAL SINAI
Il cens
26 1 Il Signôr i fevelà a Mosè e a Eleazar, fi dal predi Aron, e ur disè: 2 “Fasêt il cens di dute la comunitât dai fîs di Israel, dai vincj agns in sù, seont lis fameis dai lôr vons, di ducj chei che a puedin lâ in vuere”. 3 Mosè e il predi Eleazar ur fevelarin tes pustotis di Moab, dongje dal Gjordan, in face di Gjeric, e ur diserin: 4 “Che si fasi il cens de etât di vincj agns in sù, come che il Signôr ur veve ordenât a Mosè e ai fîs di Israel cuant che a saltarin fûr de tiere dal Egjit”.
5 Ruben, prin fi di Israel. Fîs di Ruben: Enoc, che di lui e diven la gjernazie dai enochits; Palu, che di lui e diven la gjernazie dai paluits; 6 Chezron, che di lui e diven la gjernazie dai chezronits; Carmi, che di lui e diven la gjernazie dai carmits. 7 Chestis a son lis gjernaziis dai fîs di Ruben: chei che a forin segnâts a jerin corantetre mil sietcent e trente. 8 Fîs di Palu: Eliab. 9 Fîs di Eliab: Nemuel, Datan e Abiram. Chescj a son chel Datan e chel Abiram che a fasevin part dal consei e che si rivoltarin cuintri di Mosè e cuintri di Aron dutune cu la int di Core, cuant che si jere rivoltade cuintri dal Signôr; 10 la tiere e spalancà la bocje e ju glotè insieme cun Core, cuant che chê int e murì e il fûc al divorà dusinte e cincuante oms, che a servirin di spieli. 11 Ma i fîs di Core no muririn.
12 Fîs di Simeon seont lis lôr gjernaziis. Di Nemuel e diven la gjernazie dai nemuelits; di Jamin la gjernazie dai jaminits; di Jachin la gjernazie dai jachinits; di Zocar la gjernazie dai zocarits; 13 di Saul la gjernazie dai saulits. 14 Chestis a son lis gjernaziis dai fîs di Simeon. Int forin segnâts vincjedoi mil e dusinte.
15 Fîs di Gad seont lis lôr gjernaziis. Di Sefon la gjernazie dai sefonits; di Aghi la gjernazie dai aghits; di Suni la gjernazie dai sunits; 16 di Ozni la gjernazie dai oznits; di Eri la gjernazie dai erits; 17 di Arod la gjernazie dai arodits; di Areli la gjernazie dai arelits. 18 Chestis a son lis gjernaziis dai fîs di Gad. Int forin segnâts corante mil e cinccent.
19 Fîs di Gjude: Er e Onan a muririn te tiere di Canaan. 20 Ve chi i fîs di Gjude seont lis lôr gjernaziis: di Sele e diven la gjernazie dai selenits; di Perez la gjernazie dai perezits; di Zerac la gjernazie dai zerachits. 21 I fîs di Perez a forin: Chezron, che di lui e diven la gjernazie dai chezronits; Amul, che di lui e diven la gjernazie dai amulits. 22 Chestis a son lis gjernaziis di Gjude. Int forin segnâts setantesis mil e cinccent.
23 Fîs di Issacar seont lis lôr gjernaziis: di Tole e diven la gjernazie dai tolits; di Puve la gjernazie dai puvits; 24 di Jasub la gjernazie dai jasubits; di Simron la gjernazie dai simronits. 25 Chestis a son lis gjernaziis di Issacar. Int forin segnâts sessantecuatri mil e tresinte.
26 Fîs di Zabulon seont lis lôr gjernaziis: di Sered e diven la gjernazie dai seredits; di Elon la gjernazie dai elonits; di Jacleel la gjernazie dai jacleelits. 27 Chestis a son lis gjernaziis dai fîs di Zabulon. Int forin segnâts sessante mil e cinccent.
28 Fîs di Josef seont lis lôr gjernaziis: Manasse e Efraim. 29 Fîs di Manasse: di Machir e diven la gjernazie dai machirits. Machir al à vût Galaad. Di Galaad e diven la gjernazie dai galaadits. 30 Chescj a son i fîs di Galaad: Jezer, che di lui e diven la gjernazie dai jezerits; Elek, che di lui e diven la gjernazie dai elekits; 31 Asriel, che di lui e diven la gjernazie dai asrielits; Sichem, che di lui e diven la gjernazie dai sichemits; 32 Semide, che di lui e diven la gjernazie dai semidits; Efer, che di lui e diven la gjernazie dai eferits. 33 Zelofcad, fi di Efer, nol à vûts fîs ma dome fiis e lis fiis di Zelofcad a vevin non Macle, Noe, Ogle, milche e Tirze. 34 Chestis a son lis gjernaziis di Manasse: i oms segnâts a forin cincuantedoi mil e sietcent.
35 Chescj a son i fîs di Efraim seont lis lôr gjernaziis: di Sutelac e diven la gjernazie dai sutelachits; di Beker la gjernazie dai bekerits; di Tacan la gjernazie dai tacanits. 36 Chescj a son i fîs di Sutelac: di Eran e diven la gjernazie dai eranits. 37 Chestis a son lis gjernaziis dai fîs di Efraim. Int forin segnâts trentedoi mil e cinccent. Chescj a son i fîs di Josef seont lis lôr gjernaziis.
38 Fîs di Beniamin seont lis lôr gjernaziis: di Bele e diven la gjernazie dai belits; di Asbel la gjernazie dai asbelits; di Airam la gjernazie dai airamits; 39 di Sufam la gjernazie dai sufamits; 40 di Ufam la gjernazie dai ufamits. I fîs di Bele a jerin Ard e Naaman; di Ard e diven la gjernazie dai ardits; di Naaman e diven la gjernazie dai naamanits. 41 Chescj a son i fîs di Beniamin seont lis lôr gjernaziis. I oms segnâts a forin corantecinc mil e cuatricent.
42 Chescj a son i fîs di Dan seont lis lôr gjernaziis: di Suam e diven la gjernazie dai suamits. A son chestis lis gjernaziis di Dan, seont lis lôr gjernaziis. 43 Pes gjernaziis dai suamits, in dut a forin segnâts sessantecuatri mil e cuatricent.
44 Fîs di Aser seont lis lôr gjernaziis: di Imne e diven la gjernazie dai imnits; di Isvi la gjernazie dai isvits; di Berie la gjernazie dai beriits. 45 Dai fîs di Berie a divegnin: di Eber la gjernazie dai eberits; di Malchiel la gjernazie dai malchielits. 46 La fie di Aser e veve non Sere. 47 Chestis a son lis gjernaziis dai fîs di Aser. Int forin segnâts cincuantetre mil e cuatricent.
48 Fîs di Neftali seont lis lôr gjernaziis: di Jacseel e diven la gjernazie dai jacseelits; di Guni la gjernazie dai gunits; 49 di Jeser e diven la gjernazie dai jeserits; di Silem la gjernazie dai silemits. 50 Chestis a son lis gjernaziis di Neftali seont lis lôr gjernaziis. I oms segnâts a forin corantecinc mil e cuatricent.
51 Chescj a son i fîs di Israel che a forin segnâts: siscenteun mil sietcent e trente.
52 Il Signôr i fevelà a Mosè e i disè: 53 “La tiere e sarà spartide fra di lôr, e le varan in ereditât daûr dal numar des personis. 54 A di chei che a son in plui, tu ur darâs une ereditât plui grande; a di chei che a son in mancul, tu ur darâs une eredidât plui piçule; si darà a ognidun la sô part seont il cens. 55 Però la tiere si le spartissarà a bruscjete; a varan la lôr ereditât seont i nons des tribûs dai lôr vons. 56 A spartissaran l’ereditât a bruscjete par dutis lis tribûs, grandis e piçulis”.
Cens dai levits
57 Chescj a son i levits che si fasè il cens daûr des lôr gjernaziis: di Gherson e diven la gjernazie dai ghersonits; di Keat la gjernazie dai keatits; di Merari la gjernazie dai merarits.
58 Chestis a son lis gjernaziis di Levi: la gjernazie dai libnits, la gjernazie dai ebronits, la gjernazie dai maclits, la gjernazie dai musits, la gjernazie dai corits. Keat al à vût Amram. 59 La femine di Amram e veve non Jokebed, fie di Levi, che Levi le à vude ventijù pal Egjit; i à parturît a Amram Aron, Mosè e Marie lôr sûr. 60 Aron al à vût Nadab e Abiu, Eleazar e Itamar. 61 Nadab e Abiu a muririn intant che i presentavin al Signôr un fûc che nol leve. 62 I oms segnâts a forin vincjetre mil: ducj mascjos, de etât di un mês in sù. No son stâts cjapâts dentri tal cens dai fîs di Israel parcè che no àn vude nissune ereditât framieç dai fîs di Israel.
63 Chesc a son i segnâts di Mosè e dal predi Eleazar, che a faserin il cens dai fîs di Israel tes pustotis di Moab, dongje dal Gjordan di Gjeric. 64 Fra di lôr no’ nd jere nissun di chei israelits che Mosè e il predi Aron a vevin fat il cens tal desert dal Sinai, 65 parcè che il Signôr al veve dit a rivuart di lôr: “A varan di murî tal desert!”. E no ’nt restà nancje un di numar, fale Caleb, fi di Jefune, e Gjosuè, fi di Nun.