“DIU NUS À SALVÂTS DI GRANCJ PERICUI”
Inizi de rivolte armade
8 1 Intant Gjude Macabeu e i siei compagns, passant di scuindon pai borcs, a invidavin daûrsi i parincj, tirant dongje ancje chei ch’a jerin restâts fedêi al gjudaisim; a rivarin cussì a meti adun un sîs mil oms. 2 A suplicavin il Signôr ch’al vuardàs un popul tibiât di ducj, ch’al ves dûl dal templi profanât di oms cence religjon, 3 ch’al ves remission de citât fiscade e prossime a jessi splanade, ch’al scoltàs il sanc ch’al berlave viers di lui, 4 che nol dismenteàs il maçalizi orent di fruts nocents e lis blestemis ditis cuintri dal so non e ch’al palesàs il so riviel denant di tante tristerie. 5 Cuant che il grop al fo ben inmaneât, i forescj no rivavin plui a tignî teste a Gjude, parcè che la rabie dal Signôr si jere tramudade in boncûr. 6 Plombant a bot e sclop su lis citâts e sui borcs, ur dave fûc e, cjapâts i miôrs puescj, al faseve cori no pôcs nemîs. 7 Chescj assalts al veve nant fâju di gnot. E la innomine dal so valôr si slargjave ator pardut.
Vitorie cuintri di Nicanor
8 Filip, viodint che chest om un pôc a la volte al cjapave pît e al vinceve simpri plui, i scrivè a Tolomeu, comandant de Celesirie e de Fenicie, par che i des une man tes cuistions dal re. 9 Chel altri al sielgè subit Nicanor, fi di Patroclo, un dai prins amîs dal re, e dopo di vêlu metût a cjâf di no mancul di vincj mil oms di ogni gjernazie, lu mandà a svinidrî dute la gjernazie dai gjudeus. I metè dongje ancje Gorgje, un gjenerâl di mistîr, ch’al veve pratiche di cuistions di vuere. 10 Nicanor al stabilì di paiâ lis tassis, ch’a jerin di doi mil talents, che il re al veve di dâur ai romans, vendint sclâfs gjudeus. 11 Che anzit al mandà un befel a lis citâts de cueste invidantlis a comprâ sclâfs gjudeus e impromentint di dâ novante presonîrs par un talent. No i passave nancje pal cjâf che il svindic dal Onipotent al stave par plombâi intor.
12 Gjude al vignì a savê de spedizion di Nicanor e al visà i siei compagns che l’esercit al stave rivant. 13 Alore i plui spaurôs e chei che no si fidavin de justizie di Diu le tovarin, lant a cirî salvament lontan di li. 14 Altris a vendevin dut ce che ur jere restât e tal stes timp a preavin il Signôr di liberâ chei che chel delincuent di Nicanor ju veve vendûts ancjemò prin dal combatiment; 15 se nol jere par lôr, almancul in gracie dal pat cui lôr vons e par rivuart dal so non grant ch’al jere stât clamât parsore di lôr. 16 Il Macabeu intant, dâts dongje i siei in numar di sîs mil, ju sburtave a no pierdisi di spirt denant dai nemîs e a no lassâsi cjapâ de pôre denant de fulugne dai forescj ch’a vignivin cuintri di lôr cence un parcè, ma a batisi cun snait, 17 tignint denant dai vôi dutis lis robatis ch’a vevin fatis cun tristerie cuintri dal lûc sant e la passion de citât svergognade e ancjemò l’ordinament politic dai vons, ch’al jere stât savoltât. 18 “Chei li – dissal – si fidin des lôr armis e de lôr temeritât; nô invezit si fidìn di Diu ch’al pò dut, ch’al è bon di fruçâ chei ch’a vegnin cuintri di nô e il mont intîr dome cuntune cimiade”. 19 Ur ricuardà, une par une, dutis lis voltis che Diu al veve judât i lôr vons; soredut il câs di Senecherib, cuant che a jerin muarts cent e otantecinc mil oms, 20 e ce ch’al jere sucedût in Babilonie te batae cuintri dai galazians, cuant che a vevin scugnût batisi, lôr ch’a jerin dome in vot mil cui cuatri mil macedonês; e intant che i macedonês a jerin batûts, i lôr vot mil a vevin fruçât cent e vincj mil nemîs cul jutori rivât dal Cîl, otignint un grant vantaç.
21 Cun chestis peraulis ju fasè sintî fuarts e pronts a murî pes leçs e pe patrie; po al spartì in cualchi mût l’esercit in cuatri parts, 22 metint a cjâf di ogni schirie i siei fradis Simon, Josef e Gjonate e dant in consegne a ognidun di lôr mil e cincent oms. 23 Al zontà ancje Eleazar; po a leierin il libri sant e, dade la peraule di ordenance “Jutori di Diu”, si metè lui in persone denant de prime schirie e si butà cuintri di Nicanor. 24 Chel ch’al pò dut si metè de lôr bande e cussì a rivarin a copâ passe nûf mil nemîs, a feririn e a mutilarin tal cuarp la pluritât dai soldâts di Nicanor e ju faserin talonâ ducj. 25 A rafarin ancje i bêçs dai marcjadants vignûts li par comprâju; ur corerin daûr ai nemîs un biel toc ma a tornarin indaûr par vie da l’ore. 26 E jere la vee de sabide e par chel no ur sterin plui sot. 27 Cjoltis sù lis armis dai nemîs e rafade dute la lôr robe, a passarin la sabide laudant cence padin il Signôr e ringraciantlu che ju veve salvâts in chê dì e ch’al veve scomençât a vê dûl di lôr. 28 Passade la sabide, a derin fûr a di chei ch’a vevin vûts dams, a lis veduis e ai vuarfins part di ce ch’a vevin rafât, e ce ch’al restà sal spartirin lôr e i lôr fîs. 29 Fate ancje cheste, a prearin ducj insieme il Signôr ch’al è di boncûr, suplicantlu di tornâ in buinis dal dut cui siei fameis.
Altris vitoriis di Gjude e dai siei oms
30 Si baterin ancje cuintri dai oms di Timoteu e di Bachide; ant coparin plui di vincj mil e a cjaparin lis fuartecis plui altis e a spartirin un grumon di robe rafade in parts compagnis par lôr, par chei ch’a vevin vûts dams, pes veduis e ancje pai viei. 31 Podopo, cjapadis sù lis armis dai nemîs, a platarin dut cun puntilgjo in puescj sigûrs, puartant a Gjerusalem ce ch’al restave de lôr rafe. 32 A coparin ancje il graduât ch’al comandave lis vuaitis di Timoteu, un om che no ’nd jere di piês e ch’al veve fat tribulâ dome avonde i gjudeus. 33 Biel che si stave fasint fieste pe vitorie, a brusarin chei che ur vevin dât fûc a lis puartis santis, comprendût Calistene, ch’al jere lât a parâsi tun cjasâl; cussì al cjapà il mercedi che si mertave pe sô inicuitât.
34 Il trê voltis selerât Nicanor, ch’al veve clamât dongje mil marcjadants par vendiur i gjudeus, 35 umiliât, cul jutori di Diu, di chei che lui ju spaçave par mancul di nuie, butade vie la sô tonie di lusso e sfurnît di dut, torseonant pai cjamps tant che un sclâf, al rivà a Antiochie, ancje masse content di vêle scapolade cuntun esercit fiscât. 36 Cussì chel che si jere impegnât a paiâur la tasse ai romans vendint i presonîrs di Gjerusalem, al leve ator disint che i gjudeus a vevin un che ju parave e che i gjudeus no si rivave a vinciju par mai parcè che a levin daûr des leçs che lui al veve stabilidis.