I PRECEDENTS DE LOTE
Vitorie dai fîs di Simon su lis schiriis di Antioc VII
16 1 Alore Zuan al lè sù di Ghezer e i contà a so pari Simon ce ch’al stave cumbinant Cendebeu. 2 Simon al clamà i siei doi fîs plui grancj, Gjude e Zuan, e ur disè: “Jo e i miei fradis e la cjase di gno pari o vin combatudis lis batais di Israel di cuant che o jerin zovins fint in dì di vuê e o vin rivât plui voltis a liberâ cu lis nestris mans Israel. 3 Cumò jo o soi vieli e vualtris, par remission dal Cîl, o sês te etât juste. Cjapait il puest gno e di gno fradi e lait fûr a combati pal nestri popul. E il jutori dal Cîl ch’al sedi cun vualtris”. 4 Zuan al sielgè inte tiere vincj mil oms in stât di combati e cjavalîrs; a partirin cuintri di Cendebeu e a passarin la gnot in Modin. 5 Jevâts a buinore, a lerin indenant intal plan e ve che ur vignive incuintri un grant esercit, di int a pît e a cjaval. Framieç di lôr e di chei altris al jere dome un riul. 6 Zuan cu la sô int si campà denant di lôr. Viodint che i siei a vevin pôre di passâ il riul, al passà lui par prin. I siei oms lu vioderin e a passarin daûr di lui. 7 Lui al spartì la sô int e al metè i cjavalîrs framieç dai soldâts a pît, parcè che la cjavalarie dai nemîs e jere cetant plui fuarte. 8 Po a sunarin lis trombis. Cendebeu e lis sôs schiriis a forin batûts; une vore dai lôr a restarin sul teren e chei altris a lerin a parâsi te fuartece. 9 In chê ocasion al restà ferît ancje Gjude, fradi di Zuan. Zuan invezit ur corè daûr fin ch’al rivà a Cedron, che le veve tornade a fâ sù Cendebeu. 10 I nemîs a scjamparin fin tes toressis ch’a son tai cjamps di Asdod, ma lui ur dè fûc. A restarin sul teren un doi mil nemîs. Po Zuan al tornà in Gjudee cence berdeis.
Simon copât a tradiment di so ginar Tolomeu
11 Tolomeu, fi di Abub, al jere stât metût comandant de plane di Gjeric. Al veve une vore di arint e di aur, 12 parcè che al jere ginar dal prin predi. 13 Ma il so cûr al montà in supierbie e, metût tal cjâf di cjapà la tiere, al stave masanant progjets une vore bruts cuintri di Simon e dai siei fîs par fâju fûr. 14 Simon al jere daûr a visitâ lis citâts de tiere e si interessave di ce ch’a vevin dibisugne. Al rivà a Gjeric insieme cui siei fîs Matatie e Gjude tal an cent e setantesiet, tal undicesim mês, ven a stâi tal mês di Sabat. 15 Il fi di Abub, ch’al clocive il tradiment, ju acetà intal fuartin che i disin Dok, che lu veve fat fâ lui; ur prontà un grant gustâ e intant al tignive platâts oms cu lis armis. 16 Cuant che Simon e i siei fîs a forin legris, Tolomeu e i siei oms a jevarin sù, a cjolerin lis armis e si butarin cuintri di Simon te sale là ch’a gustavin e lu coparin lui, i siei doi fîs e un trop dai siei fameis. 17 Al fasè une porcarie orende cence fin e al tornà mâl par ben.
Zuan al impedìs un complot e al cjape il puest di so pari
18 Tolomeu al scrivè un rapuart sun chest câs e jal mandà al re, par che i mandàs soldâts a dâi une man e i dès in consegne la tiere e lis citâts. 19 Al mandà ancje altris di lôr a Ghezer par fâ fûr Zuan e ur mandà letaris ai siei comandants par ch’a vignissin di lui, ch’al voleve dâur arint, aur e regâi. 20 Al mandà altris oms a cjapâ Gjerusalem e la mont dal templi. 21 Ma cualchidun al rivà a cori plui svelt, par contâi a Zuan in Ghezer che so pari al jere stât copât, zontant: “Al à mandât oms par fâti fûr ancje te”. 22 Sintint chestis robis, Zuan si sintì a mancjâ la vite. Po al cjapà i oms ch’a jerin vignûts par fâlu fûr e ju copà. Di fat al veve savût ch’a vevin chê di fâlu fûr.
23 Dutis chês altris voris di Zuan, lis sôs batais e i ats di valôr ch’al fasè, lis muris ch’al tornà a fâlis sù e ducj i siei sflandôrs, 24 ve, a son scrits tai anâi de sô incariche di prin predi, di cuant che al deventà prin predi dopo muart so pari.