RITUÂL DAI SACRIFICIS
Oblazions
2 1 Se cualchidun i puartarà une oblazion al Signôr, la sô ufierte e sarà di farine di flôr, e parsore vie al strucjarà il vueli e al metarà l’incens. 2 Ur e puartarà ai fîs di Aron, i predis; il predi al cjaparà un pugn di farine di flôr e di vueli, cul incens, e lu brusarà sul altâr a mût di memoriâl: al è un sacrifici consumât dal fûc, bonodôr che i plâs al Signôr. 3 Ce che al vanze de ufierte di oblazion e sarà par Aron e pai siei fîs, robe santissime, ch’e ven dai sacrificis consumâts dal fûc in onôr dal Signôr. 4 Cuant che tu ufrissarâs une oblazion cuete tal fôr, al sarà di fuiacis di farine di flôr, cence levan, impastadis cul vueli, e ancje di petis, cence levan, onzudis cul vueli. 5 Se la tô oblazion e sarà une ufierte cuete su la lastre, e sarà di farine di flôr, cence levan, e impastade cul vueli; 6 tu le pararâs a bocons e tu strucjarâs parsore vie il vueli: e je une oblazion. 7 Se la tô ufierte e sarà une oblazion cuete te pignate, e sarà fate di farine di flôr tal vueli; 8 tu i puartarâs al Signôr la oblazion dade dongje in cheste maniere e tu je presentarâs al predi, che le ufrissarà sul altâr. 9 Il predi al cjolarà de oblazion il memoriâl e lu brusarà sul altâr, sacrifici consumât dal fûc, bonodôr che i plâs al Signôr. 10 Ce che al vanze de oblazion al sarà par Aron e pai siei fîs, robe santissime, ch’e ven dai sacrificis consumâts dal fûc pal Signôr.
11 Nissune des oblazions che i ufrissarês al Signôr no à di vê levan: no vês di brusâ ni levan ni mîl a mût di sacrifici consumât dal fûc in onôr dal Signôr; 12 o podarês ufrîi chestis robis al Signôr tant che ufierte di primiziis, ma no podaran rivâ sul altâr tant che ufierte di bonodôr. 13 Tu âs di salâ dutis lis ufiertis di oblazion: te tô oblazion no tu âs di lassâ mancjâ il sâl dal pat dal to Diu; parsore de tô ufierte tu ufrissarâs ancje il sâl.
14 Se tu i ufrissarâs al Signôr une oblazion di primiziis, tu i ufrissarâs come oblazion di primiziis spîs creis brustulîts sul fûc e grignei di forment crei. 15 Tu strucjarâs parsore vie il vueli e tu metarâs l’incens: e je une oblazion. 16 Il predi al brusarà tant che memoriâl part dai grignei e dal vueli insieme cun dut l’incens: al è un sacrifici consumât dal fûc pal Signôr.