Domenie 30 Jugn 2024
947 AGNS DE PATRIE

BIBIE IN LINIE

Levitic

Introduzion

Torna alle bibie

Cjapitul 12

RITUÂL DAI SACRIFICIS

Regulis pe parturient

12 1 Il Signôr i fevelà a Mosè e i disè: “Dîsiur ai fîs di Israel: 2 Se une femine e cjaparà sù e e parturissarà un mascjo, e sarà soce par siet dîs; e sarà soce come tal timp des sôs robis. 3 Sui vot dîs, si circuncidarà il frut. 4 Po e restarà ancjemò trentetrê dîs a purificâsi dal so sanc; no tocjarà nissune robe sante e no jentrarà tal santuari fin che no saran finîts i dîs de sô purificazion. 5 Se invezit e parturissarà une frute, e sarà soce par dôs setemanis, come tal timp des sôs robis; e restarà sessantesîs dîs a purificâsi dal so sanc.

6 Cuant che a saran finîts i dîs de sô purificazion par un fi o par une fie, i puartarà al predi, biel jentrant de tende de cunvigne, un agnel di un an a mût di olocaust e un colomp o une tortorele a mût di sacrifici di espiazion. 7 Il predi ju ufrissarà denant dal Signôr e al fasarà par jê la funzion di espiazion e jê e sarà smondeade des sôs pierditis di sanc. Cheste e je la leç a rivuart de femine ch’e parturìs un frut o une frute. 8 Se no à pussibilitât di ufrî un agnel, e cjolarà dôs tortorelis o doi colomps: un pal olocaust e chel altri pal sacrifici di espiazion. Il predi al fasarà par jê la funzion di espiazion e jê e sarà smondeade”.

Notis:

  • 12,1 - Il part, come lis mestruazions e la pierdite di semence de part dal om (c. 15), al è considerât une pierdite di vitalitât. Fasint certis funzions, si torne a vê un rapuart bon cun Diu, risultive de vite, e partant si torne a cjapâ la vigorie di prin.
  • 12,3 - La circuncision, in tancj popui di une volte, si fasile tal moment de pubertât. In Israel, invezit, si fasile cuant che un al nas, come segnâl che lui al è jentrât no dome te vite ma ancje tal pat cun Diu (Gjen 17,10-14).
  • 12,5 - I grêcs, cun Ipocrate, a crodevin che la mari e stentàs di plui a ripiâsi se e veve vude une frute. No savìn però se la religjon e à cjapât de constatazion cliniche o l’incontrâr.
  • 12,8 - Pò stâi che cheste regule le vedin zontade plui in ca, par dâur la pussibilitât ancje ai puars. In Lc 2,21-24 o cjatìn dôs funzions: la consacrazion di Gjesù a Diu (Es 13,2-12) e la purificazion de mari seont il rituâl dai puars.
Cjapitui: