LIS TRIBÛS DI ISRAEL IN CANAAN
Otinel
Vuere di fradis jenfri Efraim e Galaad
12 1 I oms di Efraim si derin dongje e a passarin il Gjordan in direzion di Zafon e i diserin a Jefte: “Parcè mo sêstu lât a combati i amonits cence clamânus ancje nô a dâti une man? Cumò ti din fûc a ti e a la tô cjase!”. 2 Jefte ur rispuindè: “O vevin une vuere acanide, jo e la mê int, cuintri dai amonits. Jo us ài clamâts par che mi dessis une man ma vualtris no mi vês deliberât di lôr. 3 Cuant che o ài viodût che nol vignive nissun a dâmi une man, o ài fat un riscjo, mi soi butât cuintri dai amonits e il Signôr mai à metûts tes mês mans. Parcè vignîso alore cuintri di me cumò, a fâmi vitis a mi?”. 4 Alore Jefte al clamà dongje ducj i oms di Galaad e al tacà vuere cuintri di Efraim e la int di Galaad e vincè Efraim; chescj ur disevin a chei altris: “No sês int vignude di Efraim, vualtris galaadits, ma framieç di Efraim, framieç di Manasse!”. 5 Podopo Galaad i taià a Efraim i vâts dal Gjordan e cuant che chei di Efraim, che a scjampavin, ur disevin: “Lassimi lâ di là”, chei di Galaad i domandavin: “Sêstu di Efraim tu?” Se a rispuindevin: “No” 6 alore ur disevin: “Poben, prove a dî shibolet !” Chel altri al diseve sibolet , che nol jere bon di pronunciâ compagn di lôr. Alore lu brincavin e i taiavin il sgrasalâr dongje dai vâts dal Gjordan. Ta chê volte a lassarin la vite corantedoimil oms di Efraim. 7 Jefte al judicà Israel par sîs agns, po Jefte il galaadit al murì e lu soterarin te sô citât in Galaad.
Ibsan
8 Daûr di lui al deventà judiç in Israel Ibsan di Betlem. 9 Al veve trente fîs e trente fiis. Lis maridà tal forest e al fasè vignî di fûr trente brûts pai siei fîs. Al fasè il judiç in Israel par siet agns. 10 Po Ibsan al murì e lu soterarin a Betlem.
Elon
11 Daûr di lui al deventà judiç in Israel Elon di Zabulon, che al judicà Israel par dîs agns. 12 Po Elon di Zabulon al murì e lu soterarin a Aialon, te tiere di Zabulon.
Abdon
13 Daspò di lui al deventà judiç di Israel Abdon, fi di Ilel di Piraton. 14 Al veve corante fîs e trente nevôts, che a montavin sun setante mussuts. Al judicà Israel par vot agns. 15 Po Abdon, fi di Ilel di Piraton, al murì e lu soterarin a Piraton, te tiere di Efraim, su la mont dai amalecits.