preambul
PRIN GÎR DI DISCORS
Seconde rispueste di Jop
42 1 Alore Jop i rispuindè al Signôr disint:
2 O ricognos che tu tu puedis dut
e che nissun progjet par te al è impussibil.
3 Cui isal chel ch’al scurìs il progjet
cence savê nuie?
Propit, cence savê nuie
o ài ditis robis plui grandis di me, che no capìs.
4 Scoltimi, ti prei, e lassimi fevelâ;
jo ti interpelarai e tu tu mi inscuelarâs.
5 Jo ti cognossevi par sintût a dî,
ma cumò i miei vôi ti àn viodût;
6 par chel mi ricrôt
e mi pentis sul pulvin e la cinise.
CONCLUSION
Judissi cuintri dai amîs
7 Dopo di vêi fevelât cussì a Jop, il Signôr i disè a Elifaz il temanit: “La mê rabie si è infogade cuintri di te e cuintri dai tiei doi amîs parcè che no veis ditis robis justis sul gno cont, come ch’al à fat il gno famei Jop. 8 Pa la cuâl cjoleit siet vidiei e siet rocs; lait dal gno famei Jop e ufrît un olocaust par vualtris. Il gno servidôr Jop al prearà par vualtris, di mût che in gracie di lui no cjastii la vuestre matetât, parcè che no veis fevelât ben di me, come ch’al à fat il gno famei Jop”.
9 Elifaz il temanit, Bildad il suchit e Zofar il naamatit a lerin duncje e a faserin come che ur veve ordenât il Signôr. E il Signôr al vè rivuart di Jop.
Fin benedide di Jop
10 Cuant che Jop al preà pai siei amîs, il Signôr al tramudà il so distin e i tornà a dâ il dopli di ce ch’al veve vût. 11 Ducj i siei fradis, lis sôs sûrs, i siei cognossints di prime a vignirin a viodi di lui e a mangjàrin cun lui in cjase sô. Si condolerin cun lui e lu confuartàrin di dut il mâl che il Signôr i veve mandât e i regalàrin ognun un toc d’arint e un anel d’aur.
12 Il Signôr al benedì la gnove cundizion di Jop plui che no la prime. Al deventà paron di cutuardismil pioris e di sismil camêi, di mil pâr di bûs e di mil mussis. 13 I nasserin ancje siet fîs e trê fiis. 14 A la prime i metè non Colombe, a la seconde Cassie e a la tierce Bocete di belet. 15 In dute la regjon no ’nd’jere feminis cussì bielis come lis fiis di Jop; lôr pari lis metè a part de ereditât insieme cui fradis.
16 Jop al vivè, dopo di dutis chestis robis, ancjemò cent e corant’agns e al viodè i siei fîs e i fîs dai siei fîs par cuatri gjenerazions. 17 Po Jop al murì vieli e passût di agns.