preambul
PRIN GÎR DI DISCORS
Invetive dal Signôr
40 1 Il Signôr i fevelà a Jop e i disè:
2 Chel ch’al cavile cul Onipotent si rindial?
Chel ch’al critiche Diu, ch’al rispuindi!
Prime rispueste di Jop
3 Jop i rispuindè al Signôr cussì:
4 Ve’, o soi vonde piçul: ce puedio rispuindi?
Mi met la man denant de bocje.
5 O ài fevelât une volte e no insistarai;
une seconde volte e no zontarai plui nuie.
La potence di Diu
Secont discors dal Signôr
6 Il Signôr i rispuindè a Jop framieç de tampieste e i disè:
7 Peiti i ombui come un valorôs;
jo ti interpelarai e tu tu mi inscuelarâs.
8 Volaressistu propit parâ jù la mê sentence
par condanâmi me e tu jessi in reson?
9 Àstu un braç compagn di chel di Diu
e puedistu tonâ cun vôs a pâr de sô?
10 Furnissiti di glorie e majestât,
riviestissiti di sflandôr e magnificense.
11 Bute fûr i furôrs de tô rabie
e cun tune cjalade fruce ducj i supierbeôs.
12 Umilie cun tune cjalade ogni prepotent,
sfracae i triscj pardut là ch’a son.
13 Taponiju tal pulvin ducj intun mac,
siere tal scûr lis lôr musis.
14 Alore ancje jo ti fasarai onôr
parcè che la tô gjestre ti à dade vitorie.
Il beemot
15 Ve’ il beemot, che lu ài creât a pâr di te;
al mangje jerbe come il bo.
16 Cjale la fuarce dai siei ombui,
la potence de sô panse dute muscui.
17 Al drece la sô code come un cedri,
i gnêrs des sôs cuessis si lèin salts.
18 I siei vues a son cjanis di brons,
il so telâr come tocs di fier.
19 Lui al è la prime des oparis di Diu;
dome il so creadôr lu menace cu la spade.
20 Seben che lis monts i ufrissin i lôr prodoz
e dutis lis bestiis dai cjamps li si rodòlin,
21 lui si distire sot dai lotus,
framieç des cjanis e dal palût.
22 I lotus salvadis i fàsin ombrene,
i fàsin corone i vencjârs dal riu.
23 Se il flum si sglonfe, lui nol à pêl di pore;
al è sigûr, ancje se il Gjordan i rivas fin te bocje.
24 Cui podarajal brincâlu pai vôi
o forâi lis narilis cui laz?
Il Leviatan besteate orende
25 Rivistu tu a cjapâ cul am il Leviatan
e a peâ cun tune cuarde la sô lenghe?
26 Rivistu a impirâi un venc intes narilis
e a forâi lis gramulis cun tun rinc?
27 Ti fasarajal par câs un slac di suplichis
e vignarajal di te cun peraulis dolcis?
28 Fasarajal forsit cun te une aleance
par che tu lu cjolis come famei par simpri?
29 Zujarastu cun lui come cun tune passare
e lu pearastu par contentâ tôs fiis?
30 Traficarano cun lui i pescjadôrs
e s’al dividarano i marcjedanz?
31 Rivistu a tampiestâi la piel di frecis
e a colpî il so cjâf cun tun arpion?
32 Met su di lui la tô man,
pense a la batae! No tu tornarâs a tacâ.