preambul
PRIN GÎR DI DISCORS
Furtune e religjon di Jop
Lament sul distin dai umign
14 1 L’om nassût de femine,
ch’al vîf pôs dîs, cjamât di torments,
2 al bute fûr come une rose e s’inflapis,
al fuis come l’ombre cence fermâsi.
3 E tu tu tegnis i vôi spalancâts sore di lui
e tu lu clamis a rispuindi denant di te!
4 Cui puedial tirâ fûr il mont dal sporc? Nissun.
5 Se i siei dîs a son stabilîz
e tu cognossis il numar dai siei mês,
vint metût un confin che no si pò lâ di là,
6 tire vie i vôi di lui e lassilu stâ,
fin che nol à finide la sô sornade come un sot paron.
7 Pal arbul difat e je une sperance;
s’al ven tajât, al torne inmò a menâ
e i siei butui no sparissin.
8 Ancje se la sô lidrîs sot tiere s’invecjis
e il so çoc al mûr intal teren,
9 apene ch’al sint l’aghe al torne a menâ
e al bute fûr ramaçs come une plante gnove.
10 Invessit l’om, s’al mûr, no si môf plui;
là isal il mortâl cuant che al dà l’ultim respîr?
11 A podaran sparî lis aghis dal mâr
e i flums sujâsi e restâ a sec,
12 ma l’om, co si distire, nol jevarà sù plui,
fin ch’a dùrin i cîi no si svearà
e nol tornarà plui a dâ di ca dal so sium.
Denuncie e gemit
13 Joi, se tu volessis platâmi sot tiere,
scuindimi fin che no sarà passade la tô fumate,
meti un tiermin e po visâti di me!
14 Ma se l’om al mûr, puedial tornâ a vivi?
Ogni dì dal gno servissi o stares in spiete
fin che no rivares la mê volte;
15 tu mi clamaressis e jo ti rispuindares,
cuant che tu varessis passion pe vore des tôs mans.
16 Biel che cumò tu vâs contant i miei pas,
no tu tignaressis plui di voli il gno pecjât,
17 tu sieraressis intun sac la mê colpe
e sul gno pecjât tu daressis une man di blanc.
18 Invessit come che une mont e mene jù e si spache
e un cret al slache dal so puest,
19 lis aghis a rosèin i clas
e la montane e cuvierç dute la face de tiere,
cussì tu tu ridusis a nuie la sperance dal om.
20 Tu lu distiris par simpri e lui s’in’ va,
tu i sfiguris la muse e tu lu paris vie.
21 Se i siei fîs si fàsin onôr, lui no lu sa;
s’a son butâts di bande, nol ven a cognossince.
22 Lui al sint dome il torment de sô cjâr,
al sint dome la pene de sô anime.